Ուկրաինայի նախագահ Վլադիմիր Զելենսկին ԱՄՆ նախագահ Դոնալդ Թրամփի հետ քննարկել է Ուկրաինայում օդային պաշտպանության ամրապնդման և անօդաչու թռչող սարքերի համատեղ արտադրության հետ կապված հարցեր։
Նախագահ Զելենսկին այս մասին գրել է Telegram-ում։ Նա Թրամփին ասել է, որ իրենք պատրաստ են ամերիկյան հակաօդային պաշտպանության համակարգեր գնել։
«Ուկրաինան պատրաստ է գնել այդ սարքավորումները և աջակցել ամերիկյան զենք արտադրողներին։ Եվրոպան կարող է օգնել։ Նաև խոսել ենք անօդաչու թռչող սարքերի հնարավոր համատեղ արտադրության մասին», — ասել է Զելենսկին։
Նա Թրամփին պատմել է, թե ինչպես են Ստամբուլում անցել Ուկրաինայի տեխնիկական թիմի հանդիպումները Ռուսաստանի հետ, նաև գերիների ու զոհվածների մարմինների փոխանակման մասին։
«Մենք խոսեցինք մարտի դաշտում տիրող իրավիճակի մասին։ Պուտինը անկասկած չի հաղթում։ Ես Թրամփին ներկայացրի փաստերը, թե իրականում ինչ է կատարվում տեղում։ Մենք կշարունակենք աշխատել», — ընդգծել է Զելենսկին։
Ավելի վաղ Մեծ Բրիտանիայի վարչապետ Քիր Սթարմերը հայտարարել էր Ուկրաինային 350 ASRAAM հրթիռներ տրամադրելու մասին, որոնք նախատեսված են հակաօդային պաշտպանության համակարգերի համար։
Ֆինանսավորումը կստացվի սառեցված ռուսական ակտիվներից ստացված եկամուտներից։ Քիր Սթարմերը նշել է՝ արդարացի է, որ ագրեսոր երկիրը պատասխանատվություն կրի և վճարի իր կողմից սանձազերծված պատերազմի հետևանքների համար։
Հունիսի 25-ին Հաագայում կայացած գագաթնաժողովից հետո Թրամփը չի բացառել Ուկրաինային Patriot համակարգի համար հրթիռների տրամադրումը։
