ՆԱՏՕ-ի 32 առաջնորդները ժամանել են Հաագա՝ մասնակցելու գագաթնաժողովին, որը Գերմանիայի կանցլեր Ֆրիդրիխ Մերցը պատմական է համարել՝ խաղաղության ապահովման տեսանկյունից։ Սա ԱՄՆ նախագահ Դոնալդ Թրամփի առաջին մասնակցությունն է ՆԱՏՕ-ի գագաթնաժողովին 2019-ից ի վեր։
Գագաթնաժողովի առանցքային հարցերից է պաշտպանական ծախսերը ՀՆԱ-ի 5%-ի մակարդակի բարձրացնելու պայմանավորվածությունը։ Գագաթնաժողովից առաջ ՆԱՏՕ-ի գլխավոր քարտուղար Մարկ Ռյուտեն շնորհավորական ուղերձ էր հղել Թրամփին՝ նրան գովաբանելով Իրանի հետ հակամարտության ժամանակ ցուցաբերած վճռականության և դաշինքի ներսում ձեռք բերված համաձայնության համար։
Ռյուտեի ուղերձը, որը Թրամփը հրապարակել էր սոցիալական ցանցերում, արձագանքների ալիք է առաջացրել, սակայն Ռյուտեն նշել է, որ հաղորդագրությունն ամբողջությամբ հրապարակային բնույթ է կրել և որևէ խնդիր չկա։
Գագաթնաժողովը կրճատվել է, ըստ երևույթին, Թրամփի գրաֆիկին համապատասխանեցնելու համար։ Արևմտյան առաջնորդները շարունակում են ջանքեր գործադրել նրա հետ փոխհարաբերությունների հստակեցման ուղղությամբ՝ հաշվի առնելով Թրամփի անկանխատեսելի դիվանագիտական մոտեցումները։
