ՆԱՏՕ-ի անդամ երկրները պետք է մինչև 2035 թվականը իրենց պաշտպանական ծախսերը մեծացնեն մինչև ՀՆԱ-ի 5%-ը։
Հյուսիսատլանտյան դաշինքի 32 դաշնակից պետություններին հաջողվել է նման համաձայնության գալ Հաագայում հունիսի 24-25-ը նախատեսված ՆԱՏՕ-ի գագաթնաժողովից առաջ, հաղորդել են dpa, AFP և Reuters գործակալությունները՝ հղում անելով դիվանագիտական աղբյուրներին։
Ըստ dpa գործակալության, գագաթնաժողովի եզրափակիչ փաստաթղթում, որը պաշտոնապես պետք է ընդունվի հունիսի 25-ին, նշվում է, որ ՆԱՏՕ-ի անդամ երկրները այսուհետ պետք է իրենց ՀՆԱ-ի 3.5%-ն ուղղեն պաշտպանական դասական կարիքներին։
ՀՆԱ-ի ևս 1.5%-ը նախատեսվում է ներդնել ահաբեկչության դեմ պայքարում և ռազմական նպատակներով օգտագործվող ենթակառուցվածքների զարգացման մեջ, ինչպիսիք են տանկերին դիմակայող կամուրջները, երկաթուղիները և նավահանգիստները։ Այս պահին ՆԱՏՕ-ի անդամները պարտավոր են իրենց ՀՆԱ-ի 2%-ը ծախսել պաշտպանության վրա։
Այս ծախսերը մեծացնելու անհրաժեշտությունը բացատրվում է Ռուսաստանի կողմից աճող սպառնալիքով, որը 2022 թվականից պատերազմ է մղում Ուկրաինայի դեմ, ինչպես նաև ԱՄՆ նախագահ Դոնալդ Թրամփի պահանջով՝ Եվրոպայի պաշտպանության հիմնական պատասխանատվությունը դնել հենց եվրոպացիների վրա։
ՆԱՏՕ-ում ԱՄՆ մշտական ներկայացուցչությունը ողջունել է դաշինքի անդամների կողմից ռազմական ծախսերը ՀՆԱ-ի 5%-ին հասցնելու վերաբերյալ համաձայնագիրը։
