լրացվել է ժամը 16։24
Հասմիկ Դիլանյան
Կարեն Ղազարյան
«Ռադիոլուր»
Նախագահ Սերժ Սարգսյանն այսօր Երևանի մաթեմատիկական մեքենաների գիտահետազոտական ինստիտուտի «Երևան Էքսպո» ցուցահանդեսային համալիրում ներկա է գտնվել «ԴիջիԹեք էքսպո-2014» տեխնոլոգիական ցուցահանդեսի բացմանը:
Այս մասին հայտնում են ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից։
Հանրապետության Նախագահը շրջել է արդեն ավանդական դարձած «ԴիջիԹեք էքսպո» ցուցահանդեսի բաժիններում, որտեղ մասնակից շուրջ 130 ընկերություններ ներկայացրել են իրենց առաջարկները՝ հեռահաղորդակցության և ցանցային, համապարփակ ինժեներական, տեխնոլոգիական, ծրագրային, վեբ և այլ լուծումներն ու ծառայությունները:
Սերժ Սարգսյանը զրուցել է ցուցահանդեսի մասնակիցների հետ՝ նրանց գործունեության, խնդիրների և հետագա զարգացման ծրագրերի մասին։
Ցուցահանդեսի կազմակերպիչներից IT ձեռնարկությունների միավորման գործադիր տնօրեն Կարեն Վարդանյանը վստահեցրել է, որ հոբելյանական ցուցահանդեսը որակապես տարբերվում է նախորդներից: Այս անգամ ներկայացած հայրենական ընկերություններն առավելապես առաջարկում են իրենց նոր գաղափարներն ու մշակումները:
