ԱՄՆ նախագահ Դոնալդ Թրամփը հայտարարել է, որ «դժգոհ է» իր ռուս պաշտոնակից Վլադիմիր Պուտինից՝ Ուկրաինայի վրա Մոսկվայի մինչ օրս ամենամեծ օդային հարձակումից հետո։
Հանդիմանելով՝ Թրամփն ասել է. «Սա ինչ դժոխք է։ Նա շատ մարդկանց է սպանում»։ Ավելի ուշ նա Պուտինին անվանել է «բացարձակ խելագար»։
Ուկրաինայի նախագահ Վոլոդիմիր Զելենսկին ավելի վաղ հայտարարել էր, որ Վաշինգտոնի «լռությունը» վերջին ռուսական հարձակումների վերաբերյալ խրախուսում է Պուտինին՝ կոչ անելով Մոսկվայի վրա «ուժեղ ճնշում» գործադրել, այդ թվում՝ ավելի խիստ պատժամիջոցներ կիրառելով։
Ռուսաստանը 367 անօդաչու թռչող սարքեր և հրթիռներ է արձակել՝ 2022 թվականից՝ Պուտինի կողմից լայնածավալ ներխուժումից ի վերամենամեծ թիվը մեկ գիշերվա ընթացքում։ Կիրակի գիշերը Ուկրաինայում զոհվել է առնվազն 12 մարդ։
Երկուշաբթի առավոտյան Ուկրաինայի շատ շրջաններում կրկին հնչել են օդային ազդանշաններ, որոնք զգուշացնում են անօդաչու թռչող սարքերի և հրթիռների մասին։
Կիրակի ուշ երեկոյան Նյու Ջերսիում լրագրողների հետ զրույցում Թրամփը Պուտինի մասին ասել է. «Ես նրան վաղուց եմ ճանաչում, միշտ լավ եմ շփվել նրա հետ, բայց նա հրթիռներ է արձակում քաղաքների վրա և սպանում մարդկանց, և դա ինձ ընդհանրապես դուր չի գալիս»։
Հարցին, թե արդյո՞ք նա քննարկում է Ռուսաստանի նկատմամբ ԱՄՆ պատժամիջոցները խստացնելու հարցը, Թրամփը պատասխանել է․ «Անկասկած»։
Կարճ ժամանակ անց Թրամփը Truth Social-ում գրառում է արել՝ նշելով․ «Պուտինն իրոք խելագարվել է։ Ես միշտ ասել եմ, որ նա ուզում է ամբողջ Ուկրաինան, ոչ թե միայն դրա մի մասը, և գուցե դա ճիշտ է ապացուցվում, բայց եթե նա դա անի, դա կհանգեցնի Ռուսաստանի անկմանը»։
ԱՄՆ նախագահը նաև խիստ խոսքեր է ասել Զելենսկու հասցեին՝ ասելով, որ նա «իր երկրին ոչ մի օգուտ չի տալիս՝ այսպես խոսելով»։ «Նրա բերանից դուրս եկող ամեն ինչ խնդիրներ է առաջացնում, ինձ դա դուր չի գալիս, և ավելի լավ է դադարեցվի»,- Ուկրաինայի նախագահի մասին գրել է Թրամփը։
