Ուկրաինայի և Ռուսաստանի պատվիրակությունների միջև բանակցությունները կսկսվեն մայիսի 16-ին, հայտնել է ՏԱՍՍ գործակալությունը՝ հղում անելով իր աղբյուրներին։
Ինչպես հայտնում է Deutsche Welle-ն, Ուկրաինան պատրաստ է բանակցություններ վարել հրադադարի շուրջ։ Ուկրաինայի նախագահ Վոլոդիմիր Զելենսկին պաշտպանության նախարար Ռուստեմ Ումերովի գլխավորած պատվիրակություն է ուղարկել Ստամբուլ՝ բանակցություններ վարելու համար։
Ավելի վաղ նա հայտնել էր, որ Թուրքիա մեկնած պատվիրակության կազմում են նաև Ուկրաինայի արտաքին գործերի նախարարության ղեկավար Անդրեյ Սիբիգան, նախագահի աշխատակազմի ղեկավար Անդրեյ Երմակը, Ուկրաինայի զինված ուժերի գլխավոր շտաբի պետ Անդրեյ Գնատովը, Ուկրաինայի անվտանգության ծառայության ղեկավար Վասիլ Մալյուկը և բոլոր հետախուզական գործակալությունների ներկայացուցիչներ։
Զելենսկու խոսքով՝ Ստամբուլում բանակցությունների գլխավոր նպատակը հրադադարն է, որի շուրջ ուկրաինական պատվիրակությունն ունի քննարկելու մանդատ։
Նա հավելել է, որ բանակցողների խումբը նույնպես մայիսի 16-ին կլինի Թուրքիայում, նաև ԱՄՆ ներկայացուցիչների հետ հանդիպելու համար։
Ստամբուլում գտնվող ռուսական պատվիրակությունը գլխավորում է Ռուսաստանի նախագահի օգնական Վլադիմիր Մեդինսկին։ Բանակցություններին չի մասնակցում ոչ Ռուսաստանի արտաքին գործերի նախարարության ղեկավար Սերգեյ Լավրովը, ոչ էլ Ռուսաստանի պաշտպանության նախարարության ղեկավար Անդրեյ Բելոուսովը։
Կրեմլը բանակցություններին ուղարկել է Լավրովի տեղակալ Միխայիլ Գալուզինին, Բելոուսովի տեղակալ Ալեքսանդր Ֆոմինին և Ռուսաստանի զինված ուժերի գլխավոր շտաբի գլխավոր վարչության պետ Իգոր Կոստյուկովին։
Ուկրաինայի հետ բանակցություններում Ռուսաստանի պատվիրակության ղեկավար Վլադիմիր Մեդինսկին հայտարարել է, որ Ստամբուլում Ուկրաինայի հետ ուղիղ բանակցություններում Ռուսաստանի խնդիրն է վաղ թե ուշ հասնել «երկարաժամկետ խաղաղության՝ վերացնելով հակամարտության հիմնական արմատական պատճառները»։
