Մայիսի 11-ի ուշ գիշերային հայտարարության մեջ ՌԴ նախագահ Վլադիմիր Պուտինը մերժել է նոր 30-օրյա հրադադար հայտարարելու մասին Ուկրաինայի և նրա արևմտյան դաշնակիցների առաջարկը՝ մեղադրելով Կիևին Մոսկվայի կողմից հայտարարված նախորդ հրադադարները խախտելու մեջ։
Նա առաջարկել է, ի թիվս այլ հարցերի, քննարկել հրադադարի հարցը Մոսկվայի և Կիևի միջև ուղիղ բանակցությունների ընթացքում, որոնք, նրա խոսքով, կարող են տեղի ունենալ արդեն մայիսի 15-ին Ստամբուլում։ Մոսկվան պատրաստ է մասնակցել դրանց առանց նախապայմանների, ասել է Ռուսաստանի նախագահը։
«Մենք առաջարկում ենք անհապաղ սկսել հաջորդ հինգշաբթի՝ մայիսի 15-ին, Ստամբուլում։ Այնտեղ, որտեղ բանակցություններն ավելի վաղ անցկացվել են և ընդհատվել», — ասել է Պուտինը։
Կիևի առաջարկը՝ մայիսի 12-ից հրադադար հայտարարելու մասին, հնչել է մեկ օր առաջ՝ Ուկրաինայում «կամավորների կոալիցիայի» գագաթնաժողովից և Ֆրանսիայի, Մեծ Բրիտանիայի, Լեհաստանի և Ուկրաինայի առաջնորդների՝ ԱՄՆ նախագահ Դոնալդ Թրամփի հետ համատեղ հեռախոսազրույցից հետո, ով աջակցել է հրադադարի պահանջի մասին ընդհանուր որոշմանը։
Պուտինի խոսքով՝ նոր բանակցությունները պետք է լինեն 2022 թվականի Ստամբուլի բանակցությունների շարունակությունը։
Նա հայտնել է, որ մայիսի 11-ին նախատեսում է այս նախաձեռնությունը քննարկել Թուրքիայի նախագահ Ռեջեփ Էրդողանի հետ, որը միջնորդ էր Կիևի և Մոսկվայի միջև 2022 թվականին։
«Հնարավոր է, որ բանակցությունների ընթացքում հնարավոր լինի համաձայնության գալ նոր զինադադարի շուրջ», — ասել է Պուտինը՝ հավելելով, որ այժմ «գնդակը Ուկրաինայի դաշտում է»։
Կիևը դեռևս չի մեկնաբանել Կրեմլի առաջարկը՝ Ստամբուլում նոր բանակցություններ անցկացնելու վերաբերյալ։
