Իրանում ՀՀ դեսպան Գրիգոր Հակոբյանը մայիսի 3-ին հանդիպում է ունեցել Իրանի լեզվի և գրականության ակադեմիայի նախագահ Ղոլամալի Հադադ Ադելի հետ, հայտնում է Իրանում ՀՀ դեսպանությունը:
Հանդիպման ընթացքում քննարկվել են գիտակրթական ոլորտում համագործակցության հնարավորությունները։ Երկուստեք կարևորվել է համատեղ գիտական միջոցառումների՝ համաժողովների ուսումնական ծրագրերի անցկացումը:
Ղոլամալի Հադադ Ադելը դրվատանքի խոսքեր է ասել իրանագիտության հայկական դպրոցի վերաբերյալ՝ նշելով, որ հայ իրանագետները մեծ դեր են խաղացել գիտական այս ճյուղի զարգացման գործում։
Իրանի լեզվի և գրականության ակադեմիայի նախագահը նաև ընգծել է, որ իր ղեկավարած կառույցը պատրաստ է իրականացնել ծրագրեր Հայաստանում պարսից լեզվի ուսուցման զարգացման ուղղությամբ, այդ թվում՝ հայ մասնագետների վերապատրաստման դասընթացների անցկացում Իրանում, անհրաժեշտ ուսումնամեթոդական գրականության տրամադրում։
