ԱՄՆ Պետդեպարտամենտը հավանություն է տվել Ուկրաինային տրամադրվող նոր օգնության փաթեթին

ԱՄՆ Պետդեպարտամենտը հաստատել է F-16 կործանիչների և դրանց հետ կապված սարքավորումների հնարավոր վաճառքը Ուկրաինայի կառավարությանը:

ԱՄՆ պաշտպանության նախարարության Պաշտպանական անվտանգության համագործակցության գործակալությունը (DSCA) տրամադրել է անհրաժեշտ հավաստագրերը՝ այդ մասին տեղեկացնելով ԱՄՆ Կոնգրեսին, հայտնել են գործակալությունից։

Փաթեթը, որն արժե 310.5 միլիոն դոլար, ներառում է ինքնաթիռների արդիականացման ծառայություններ, անձնակազմի վերապատրաստում շահագործման և սպասարկման համար, պահեստամասեր, ծրագրային ապահովում, տեխնիկական փաստաթղթեր և այլ հարակից լոգիստիկ տարրեր։

Առաջարկվող վաճառքը կբարձրացնի Ուկրաինայի կարողությունը՝ հակազդելու ներկա և ապագա սպառնալիքներին՝ օդաչուների արդյունավետ վերապատրաստման և Միացյալ Նահանգների հետ օպերատիվ փոխգործունակությունը բարձրացնելու միջոցով, հայտարարել է DSCA-ն։

Հիմնական կապալառուների թվում կլինեն Valiant Integrated Services-ը, Top Aces Corporation-ը, Lockheed Martin Aeronautics-ը, Pratt and Whitney-ն, Snap-on Inc.-ը, BAE Systems Inc.-ը, AAR Corporation-ը և Comsetra LLC-ն։

Հնարավոր վաճառքը «չի փոխի տարածաշրջանում ռազմական հիմնական հավասարակշռությունը», կարծում են ԱՄՆ-ում։

Ավելի վաղ՝ ապրիլի 8-ին, հայտնի էր դարձել, որ Բելգիան Ուկրաինային կփոխանցի չորս F-16 կործանիչ։ Դրանցից երկուսը երկիր կժամանեն այս տարի, իսկ ևս երկուսը՝ հաջորդ տարի, հայտարարել էր Բելգիայի վարչապետ Բարտ դե Վևերը Ուկրաինայի նախագահ Վլադիմիր Զելենսկու հետ Կիևում կայացած համատեղ ասուլիսում։