Վատիկանում ավարտվել է Հռոմի պապ Ֆրանցիսկոսի հուղարկավորության արարողությունը:
Տասնյակ հազարավոր մարդիկ ներկա են գտնվել Վատիկանի Սուրբ Պետրոսի հրապարակում՝ վերջին հրաժեշտը տալու Ֆրանցիսկոս պապին:
Վերջին հրաժեշտի արարողությանը մասնակցել են նաև աշխարհի մոտ 50 առաջնորդներ, այդ թվում՝ ԱՄՆ նախագահ Դոնալդ Թրամփը, Ուկրաինայի նախագահ Վոլոդիմիր Զելենսկին, աշխարհի տարբեր ծայրերից ժամանած կարդինալներ:
ԱՄՆ և Ուկրաինայի նախագահները կարճ զրույց են ունեցել հուղարկավորության արարողությունից առաջ։ Սպիտակ տունն այդ զրույցը «շատ արդյունավետ» է որակել։
Ամենայն Հայոց կաթողիկոսն ու Հայաստանի նախագահը ևս մասնակցել են արարողությանը:
Ավելի քան 100 տարվա ընթացքում սա առաջին դեպքն է, երբ Հռոմի պապը հուղարկավորվում է Վատիկանի սահմաններից դուրս:
Հուղարկավորությանը զուգահեռ կսկսվի իննօրյա սուգը, որից հետո կարդինալները կոնկլավ կգումարեն՝ ընտրելու աշխարհի 1.4 միլիարդ կաթոլիկների նոր պապին:
Բուենոս Այրեսում իտալացի ներգաղթյալների ընտանիքում ծնված Ֆրանցիսկոս պապը Կաթոլիկ եկեղեցու առաջնորդի գահը ստանձնել էր 2013 թվականին՝ դառնալով առաջին ամերիկացին, առաջին ճիզվիտը և առաջին հովվապետը, որը ծնվել է Եվրոպայից դուրս ավելի քան մեկ հազարամյակի ընթացքում:
