Ջամմու և Քաշմիր նահանգի վերահսկողության գծի երկայնքով փոխհրաձգություն է տեղի ունեցել, հաղորդել է PTI գործակալությունը՝ հղում անելով բանակի աղբյուրին։
«Վերահսկողության գծի որոշ հատվածներում Պակիստանի նախաձեռնությամբ կրակ է բացվել հրաձգային զենքից», — ասել է աղբյուրը։ «Հրաձգությանն արդյունավետ արձագանք է եղել», — հավելել է նա։ Զոհերի մասին հաղորդագրություններ չկան։
Գործակալությունը հայտնում է, որ փոխհրաձգությունը տեղի է ունեցել երկու կողմերի միջև լարվածության աճի ֆոնին՝ Փահալգամում իրականացված ահաբեկչական հարձակման պատճառով, որի հետևանքով զոհվել է 26 խաղաղ բնակիչ։
Ապրիլի 22-ին զինված անձինք ահաբեկչական հարձակում են գործել զբոսաշրջային հայտնի Պահալգամ քաղաքում (Ջամմուի և Քաշմիրի Հնդկաստանի միութենական տարածք): Զոհվել է 25 Հնդկաստանի քաղաքացի և մեկ նեպալցի, շատերը վիրավորվել են։ Հարձակվողներին հաջողվել է փախուստի դիմել։ Հնդկաստանի հետախուզական ծառայություններն ապացույցներ ունեն, որ Պակիստանի միջգերատեսչական հետախուզությունը և «Լաշկար-է-Թայբա» խմբավորումը մասնակություն են ունեցել իրականացված հարձակմանը, հաղորդում է The Hindustan Times-ը՝ վկայակոչելով իր աղբյուրներին։
Ահաբեկչական հարձակումից հետո Հնդկաստանի իշխանությունները գրեթե կիսով չափ կրճատել են Իսլամաբադում դեսպանատան աշխատակիցների թիվը, Հնդկաստանում Պակիստանի դիվանագիտական առաքելության ռազմական խորհրդականներին հայտարարել են անցանկալի անձ և փակել են Պակիստանի հետ սահմանին գտնվող Աթթարիի կարևորագույն անցակետը։ Հնդկաստանի իշխանությունները նաև կասեցրել են Իսլամաբադի հետ ջրային ռեսուրսների բաշխման վերաբերյալ համաձայնագիրը, իսկ կառավարությունը որոշել է նաև անհապաղ կասեցնել Պակիստանի քաղաքացիներին վիզաների տրամադրումը և ապրիլի 27-ից չեղարկել նախկինում տրվածները։
Պակիստանի Անվտանգության խորհուրդը հայտարարել է, որ կասեցնում է Հնդկաստանի հետ բոլոր երկկողմ համաձայնագրերը և նշել, որ Հնդկաստանի կողմից Ինդոս գետից ջրի հոսքը շեղելու ցանկացած փորձ կընկալվի որպես պատերազմական ակտ։ Բացի այդ, Պակիստանը Հնդկաստանի համար փակել է իր օդային տարածքը, Վագահ անցակետը, և պաշտպանության, ռազմածովային և ռազմաօդային ուժերի հարցերով հնդիկ խորհրդականներին հայտարարել է անցանկալի անձ։ Պակիստանի Անվտանգության խորհրդի զեկույցի համաձայն՝ կան ապացույցներ, որ Հնդկաստանը հովանավորում է ահաբեկչական խմբավորումներին։
