Առանց Պապի․ Վատիկանը հայտարարել է Զատկի արարողությունների նոր ձևաչափի մասին

Վատիկանը հայտարարել է այս տարվա Զատկի գլխավոր ծիսակարգերի նոր ձևաչափի մասին, քանի որ Հռոմի պապ Ֆրանցիսկոսը դեռևս ամբողջությամբ չի վերականգնվել առողջական լուրջ խնդիրներից հետո։

Ավագ շաբաթ օրը Սուրբ Պատարագը կգլխավորի կարդինալ Ջովաննի Բատիստա Ռեյը, ում Հռոմի պապը հանձնարարել է փոխարինել իրեն։

Ավագ ուրբաթ օրը Սուրբ Պատարագը Սուրբ Պետրոսի տաճարում կնախաձեռնի կարդինալ Կլաուդիո Գուջերոտին, իսկ երեկոյան Խաչի ճանապարհի ավանդական արարողությունը Կոլիզեյում կկայանա կարդինալ Բալդո Ռեյնայի առաջնորդությամբ։

Զատկի կիրակի առավոտյան Սուրբ Պետրոսի հրապարակում Սուրբ Պատարագը կմատուցի կարդինալ Անջելո Կոմաստրին։

Պապ Ֆրանցիսկոսը չի մասնակցում այս տարի Զատկի պատարագներին, քանի որ փետրվարի 14-ին նա հիվանդանոց էր տեղափոխվել բրոնխիտով, որն ավելի ուշ վերածվել էր կրկնակի թոքաբորբի։ Հռոմի պապը հիվանդանոցում անցկացրել է 38 օր։

Չնայած ծանր ընթացքին, ապրիլի 6-ին Ֆրանցիսկոսն առաջին անգամ հայտնվել է հրապարակում և անձամբ ողջունել հավատացյալներին՝ հիվանդանոցից դուրս գրվելուց հետո։

Վատիկանի ներկայացուցիչները շեշտել են, որ Հռոմի պապի առողջական վիճակը պահանջում է խնամքով վերականգնում, ինչի պատճառով այս տարի որոշ արարողություններ կանցկացվեն առանց Հռոմի պապի։