Մյանմայում ավերիչ երկրաշարժի զոհերի թիվը հասել է 3085-ի, ավելի քան 4715 մարդ վիրավորվել է։ Ապրիլի 1-ից երկրում մեկշաբաթյա սուգ է հայտարարվել:
Երկրաշարժից երեք օր անց շենքերի փլատակների տակ մնացածներին ողջ մնացած գտնելու քիչ հույս կա, հաղորդում է AFP-ն:
Փրկարարական աշխատանքները բարդանում են շոգ եղանակի պատճառով, ջերմաստիճանը բարձրանում է մինչև 40 աստիճան:
Երկրաշարժի էպիկենտրոնի մոտ գտնվող Մանդալայ քաղաքում շոգն արագացրել է մահացածների մարմինների քայքայումը, ինչը կարող է դժվարացնել նրանց նույնականացումը, նշում է գործակալությունը։
ԱՀԿ-ն հայտարարել է տագնապի ամենաբարձր մակարդակը
Առողջապահության համաշխարհային կազմակերպությունը (ԱՀԿ) հայտարարել է արտակարգ դրության ամենաբարձր մակարդակ՝ քաղաքացիական պատերազմում գտնվող Մյանմայում հիվանդությունների տարածման սպառնալիքի պատճառով։
ԱՀԿ-ին շտապ անհրաժեշտ է 8 միլիոն դոլար (7,4 միլիոն եվրո)՝ օգնություն ցուցաբերելու, հիվանդությունների բռնկումները կանխելու և Մյանմայում հիմնական առողջապահական ծառայությունները վերականգնելու համար:
Մյանմայի ռազմական առաջնորդ Մին Աուն Հլաինգը օգնություն է խնդրել «յուրաքանչյուր երկրից, յուրաքանչյուր կազմակերպությունից»։ Նախկինում երկրի ռազմական իշխանությունները հրաժարվում էին միջազգային օգնությունից նույնիսկ խոշոր բնական աղետների դեպքում, նշում է AFP-ն։
Երկրաշարժից տուժել են նաև հարևան երկրները
Մարտի 28-ին Մյանմայում գրանցվել է մի քանի հզոր ցնցում՝ յուրաքանչյուրը 7,7 մագնիտուդ ուժգնությամբ։ Ցնցումներ են զգացվել նաեւ Թաիլանդում, Չինաստանում և Վիետնամում։ Թաիլանդում երկրաշարժի հետեւանքով 19 մարդ է զոհվել, ևս 75 մարդ անհետ կորած է համարվում։
