Ուկրաինայի նախագահ Վոլոդիմիր Զելենսկին ժամանել է Սպիտակ տուն՝ ուկրաինական պատերազմի և օգտակար հանածոների վերաբերյալ գործարքի շուրջ ԱՄՆ նախագահ Դոնալդ Թրամփի հետ բանակցությունների համար:
Աշխարհի բոլոր լրատվամիջոցների ուշադրության կենտրոնում գտնվող այս հանդիպումը, Reuters-ի փոխանցմամբ, ուղիղ չի հեռարձակվում։ Ակնկալվում է, որ սկզբում երկու երկրների առաջնորդները կպատասխանեն լրագրողների հարցերին, ապա դռնփակ կքննարկեն հանդիպման օրակարգում ընդգրկված հարցերը։
Ավելի վաղ Թրամփը հայտնել էր, որ ուրբաթ օրը հանդիպելու է Զելենսկու հետ։ Ակնկալվում է, որ երկու ղեկավարները կքննարկեն հազվագյուտ օգտակար հանածոների վերաբերյալ համաձայնագրերը:
Ըստ ուկրաինական լրատվամիջոցների՝ Ուկրաինայի և ԱՄՆ-ի միջև վերակառուցման ներդրումային հիմնադրամի ստեղծման մասին համաձայնագիրը բաղկացած է 11 կետից։
Բազմաթիվ լրատվամիջոցներ նշել են, որ համաձայնագրում Ուկրաինայի կողմից սպասվող անվտանգության երաշխիքների վերաբերյալ միայն հակիրճ նշվում է 10-րդ կետում. «Ամերիկայի Միացյալ Նահանգների կառավարությունն աջակցում է Ուկրաինայի ջանքերին՝ ձեռք բերելու անվտանգության երաշխիքներ, որոնք անհրաժեշտ են կայուն խաղաղություն հաստատելու համար»:
ԱՄՆ կառավարության բարձրաստիճան պաշտոնյան հայտնել է, որ հանքային համաձայնագրում, որը Թրամփը նախատեսում է ստորագրել Զելենսկու հետ ուրբաթ օրը, չեն ներառված Ուկրաինային աջակցելու ԱՄՆ-ի ապագա պարտավորությունները:
Պաշտոնյան նաև նշել է, որ ԱՄՆ-ի և Ուկրաինայի միջև տնտեսական գործընկերությունը չի ենթադրում ապագա պատերազմի ֆինանսավորման որևէ կոնկրետ երաշխիք, ինչպես նաև տարածաշրջանում ամերիկյան անձնակազմ տեղակայելու որևէ պարտավորություն: Պաշտոնյան ընդգծել է, որ հանքային համաձայնագիրը «կարևոր քայլ է» ուկրաինական ճգնաժամին վերջ դնելու գործում։
