Վաշինգտոնը ցանկանում է, որ Ուկրաինայում նախագահական ընտրությունները տեղի ունենան մինչև 2025 թվականի ավարտը, հատկապես, եթե Ռուսաստանի հետ հրադադար հաստատվի։ Այս մասին Reuters-ին ասել է Ուկրաինայի հարցով ԱՄՆ նախագահի հատուկ բանագնաց Քիթ Քելոգը։
«Ժողովրդավարական երկրներից շատերը ընտրություններ են անցկացնում պատերազմի ժամանակ: Ես կարծում եմ, որ դա կարևոր է», — ասել է Քելլոգը: «Կարծում եմ, որ դա լավ է ժողովրդավարության համար»:
Ե՛վ Քելլոգը, և՛ ԱՄՆ նախագահ Դոնալդ Թրամփը ավելի վաղ հայտարարել էին, որ ցանկանում են համաձայնության գալ՝ առաջիկա մի քանի ամիսների ընթացքում Ուկրաինայում հակամարտությունը դադարեցնելու վերաբերյալ:
Թրամփի ծրագիրը դեռ ձևակերպման փուլում է, և դեռ վերջնական որոշումներ չեն կայացվել, թե ինչպիսին է լինելու Սպիտակ տան քաղաքականությունը, գործակալությանը հայտնել են իրավիճակին ծանոթ մի քանի աղբյուրներ։
Ուկրաինական կառավարության աղբյուրն էլ Reuters-ին ասել է, որ Թրամփի վարչակազմը դեռ պաշտոնապես չի դիմել իրենց մինչև տարեվերջ նախագահական ընտրություններ անցկացնելու խնդրանքով։
