Վրաստանի նախագահ Սալոմե Զուրաբիշվիլին Վրաստան ժամանած լեհ և լիտվացի եվրապատգամավորների հետ միացել է Սաարբրյուկենի կամրջի վրա ընթացող «Միասնության շղթա» ակցիային։ Նախագահին ուղեկցել են նրա ընտանիքի անդամներն ու նախագահի աշխատակազմի աշխատակիցները։
Թբիլիսիում հերթական հակակառավարական ցույցն է ընթանում։ Այս անգամ Ռուսթավելի պողոտայի փոխարեն ցուցարարները որոշել են կանգնել Կուր գետի կամուրջների վրա և մարդկային շղթա կազմել։
«Միասնության շղթան» երկու պահանջ ունի՝ նշանակել արտահերթ ընտրություններ և ազատ արձակել ցույցերի ժամանակ բերման ենթարկվածներին։
Ցույցերի նոր ալիքը սկսվել է նոյեմբերի 28-ին՝ երկրի վարչապետ Իրակլի Կոբախիձեի հայտարարությունից հետո, թե իշխանությունները որոշել են մինչև 2028 թվականն օրակարգից հանել Եվրամիությանն անդամակցելու շուրջ բանակցությունների հարցը և հրաժարվել բյուջետային բոլոր դրամաշնորհներից։
Վրաստանի ներկայիս նախագահ Սալոմե Զուրաբիշվիլիի լիազորությունների ժամկետը լրանում է դեկտեմբերի 29-ին՝ նոր նախագահ Միխեիլ Կղավելաշվիլիի երդմնակալությունից հետո։
Զուրաբիշվիլին հայտարարել է, որ կշարունակի մնալ երկրի նախագահի պաշտոնում, քանի որ չի ճանաչում հոկտեմբերի 26-ի խորհրդարանական ընտրությունների արդյունքները և, համապատասխանաբար, դեկտեմբերի 14-ին ընտրական կոլեգիայի կողմից Կղավելաշվիլիի ընտրությունը։
Ավելի վաղ Կոբախիձեն Զուրաբիշվիլիին զգուշացրել էր քրեական պատասխանատվության մասին, եթե նա որոշի ապօրինի մնալ նախագահական նստավայրում իր լիազորությունների ավարտից հետո։
