Սիրիայի քրիստոնեական եկեղեցիների առաջնորդները խորհուրդ են տալիս իրենց համայնքների անդամներին այս տարի զուսպ նշել Սուրբ ծնունդը, չնայած իսլամիստների հավաստիացումներին, որ կրոնական փոքրամասնություններն ազատ են իրենց կրոնը դավանելու հարցում:
Սիրիայի նոր իշխանությունների փաստացի ղեկավար Ահմեդ ալ Շարան քրիստոնյաներին և կրոնական այլ փոքրամասնություններին վստահեցրել է, որ կարող են իրենց ապահով զգալ Սիրիայում:
Սիրիա այցելած արևմտյան պաշտոնյաներին նա ասել է, որ չի ճնշելու որևէ կրոնական փոքրամասնության: Սակայն շատ քրիստոնյաներ դեռ պետք է համոզվեն դրանում, գրում է Reuters-ը:
Դեկտեմբերի18-ին զինված անհայտ անձինք կրակ են բացել Համա քաղաքի հունական ուղղափառ եկեղեցու վրա՝ ներխուժելով փորձել են քանդել խաչը և ջարդել գերեզմանատան տապանաքարերը:
Reuters-ի լրագրողները տեսել են, թե ինչպես են ամենագնացները, ջիհադիստական երգերը շատ բարձ միացրած, ընթանում Դամասկոսի հիմնականում քրիստոնյաներով բնակեցված Բաբ Թումա թաղամասով և անհանգստացնում բնակիչներին:
Իսկ սոցցանցերում մի լուսանկար է տարածվել, որում քրիստոնեական թաղամասով շրջող զրահամեքենայի դիմապակուն գրված է՝ «Ձեր օրը գալիս է, ո՜վ խաչի երկրպագուներ»:
Ասորի ուղղափառ եկեղեցու եպիսկոպոս Էնդրյու Բահին Reuters-ին ասել է, որ միջադեպը շատ մտահոգիչ է: Բայց նա նաև նշել, որ երբ «Հայաթ Թահրիր ալ-Շամ»-ին (HTS) հայտնել են, արագ արձագանքել են՝ ստիպելով վարորդին հանել ցուցանակը և ներողություն խնդրել։
«Հայաթ Թահրիր ալ-Շամ»-ի ներկայացուցիչը հանդիպել է Բահիի և այլ քրիստոնյա առաջնորդների հետ և ասել, որ չվախենան: «Բայց որքանո՞վ է դա ճշմարտացի և լուրջ: Մենք չգիտենք», — ասել է Բահին:
Նույնիսկ եթե վստահություն լինի «Հայաթ Թահրիր ալ-Շամ»-ի նկատմամբ, քրիստոնյաները վախենում են նաև իսլամիստ զինյալ այլ խմբավորումներից, գրում է Reuters-ը։
