Երեկ ուշ երեկոյան վարորդը մեքենայով մխրճվել է կենտրոնական Գերմանիայում Սուրբծննդյան տոնավաճառում գտնվող մեծ ամբոխի մեջ, ինչի հետևանքով մահացել է առնվազն երկու մարդ և վիրավորվել ավելի քան 60-ը։ Ինչպես հայտնում է Reuters-ը, մահացածներից մեկը երեխա է, ասել է Սաքսոնիա-Անհալթ նահանգի վարչապետ Ռայներ Հասելոֆը: Միջադեպը տեղի է ունեցել նահանգի մայրաքաղաք Մագդեբուրգում՝ Բեռլինից 150 կմ (90 մղոն) դեպի արևմուտք։
«Դա աղետ է Մագդեբուրգ քաղաքի, նահանգի և ընդհանրապես Գերմանիայի համար»,-ասել է Հասելոֆը՝ հավելելով, որ զոհերի թիվը կարող է ավելանալ՝ հաշվի առնելով որոշ վիրավորների վիճակի ծանրությունը։
Հասելոֆը հարձակվողին նկարագրել է որպես 50-ամյա տղամարդ բժիշկ Սաուդյան Արաբիայից, ով մշտական բնակություն է հաստատել Գերմանիայում, որտեղ նա ապրել է գրեթե երկու տասնամյակ:
«Այս պահին մենք խոսում ենք միայնակ հանցագործի մասին, ինչը նշանակում է, որ քաղաքի համար հետագա վտանգ չկա, քանի որ մենք կարողացանք ձերբակալել նրան»:
Շարժառիթը պարզ չէ։
Կասկածյալը գերմանական իշխանություններին հայտնի չէր որպես իսլամիստ, տեղական MDR հեռուստատեսության համաձայն՝ Սաուդյան Արաբիայի աղբյուրը Reuters-ին հայտնել է, որ թագավորությունը նախազգուշացրել է գերմանական իշխանություններին հարձակվողի մասին, ով, ըստ աղբյուրի, ծայրահեղական հայացքներ է հրապարակել իր անձնական X էջում:
Աղբյուրը հայտնել է, որ կասկածյալը Թալեբ Աբդուլ Ջավադն է: Գերմանական Der Spiegel-ը նշել է, որ հարձակվողը Թալեբ Ա.-ն է, հոգեբուժության և հոգեթերապիայի մասնագետ, ով համակրում էր Գերմանիայի ծայրահեղ աջ «Այլընտրանք Գերմանիայի համար» կուսակցությանը:
Պարբերականը չի նշել, թե որտեղից է ստացել այդ տեղեկությունը։
