Իսրայելը Տարտուս նահանգում հարձակվել է սիրիական հակաօդային պաշտպանության համակարգերի վրա, հարվածի ուժը համեմատելի էր երկրաշարժի հետ, հայտնել է ՏԱՍՍ-ի աղբյուրը։
«Նրանք հարվածել են Տարտուսի տարածքում ցեմենտի գործարանին, այնտեղ սիրիական հակաօդային պաշտպանության համակարգերն էին, ինչ-որ հզոր բան էր, նույնիսկ հեռախոսային ծրագրերը երկրաշարժ են գրանցել», — հեռախոսով ասել է գործակալության զրուցակիցը։
Ավելի ուշ հրապարակվել են ուժգին հարվածի կադրերը:
Դեկտեմբերի 16-ին «Ալ Մանար» հեռուստաալիքը հայտնել է, որ Իսրայելի ռազմաօդային ուժերը հարվածներ են հասցրել Սիրիայի Տարտուս, Համա և Հոմս նահանգներում գտնվող ռազմական օբյեկտներին: Հարվածների թիրախներն են եղել զինամթերքի պահեստները։ Al Mayadeen TV-ն հաղորդել է, որ Իսրայելի ռազմաօդային ուժերի կործանիչները և ռազմածովային նավերը վերջին ժամերին Տարտուսի և Լաթաքիայի միջև ընկած ափամերձ շրջաններում հրթիռային հարվածներ են հասցրել սիրիական ՀՕՊ ուժերի 12 մարտկոցներին և վաղ նախազգուշացման ռադարներին:
Դեկտեմբերի 8-ին իսրայելական զինվորականները վերահսկողության տակ են վերցրել Գոլանի բարձունքներում գտնվող Հերմոն լեռնաշղթայի սիրիական կողմը՝ առանց դիմադրության հանդիպելու։
Իսրայելի վարչապետ Բենիամին Նեթանյահուի խոսքով՝ Սիրիայի հետ 1974 թվականին ստորագրված ուժերի բաժանման համաձայնագիրը անվավեր է դարձել, քանի որ սիրիական զորքերը Դամասկոսում իշխանափոխությունից հետո լքել են տարածքը։ Իսրայելի ռազմաօդային ուժերը շարունակում են հարձակումները Սիրիայում ռազմական օբյեկտների վրա։
Դեկտեմբերի 10-ին Իսրայելի պաշտպանության նախարար Իսրայել Կացը հայտարարել է, որ իր երկրի ռազմածովային ուժերը գործնականում ոչնչացրել են Արաբական Հանրապետության ռազմական նավատորմը: Դեկտեմբերի 12-ին բանակի մամուլի ծառայությունը հայտնել է, որ Իսրայելի ռազմաօդային ուժերը մի շարք զանգվածային հարվածների ժամանակ ոչնչացրել են «երկիր-օդ» հրթիռների հայտնաբերված պաշարների ավելի քան 90%-ը։
