Հնդկական օվկիանոսում ֆրանսիական Մայոտ արշիպելագում (այս տարածքը գտնվում է Կոմորյան կղզիների մոտ, Մադագասկարից 300 կիլոմետր հեռավորության վրա) մեծ ավերածությունների պատճառ դարձած «Շիդո» ցիկլոնի հարվածից հետո փրկարարական գործողություններ են իրականացվում։
Տեղի վարչակազմի ղեկավար Ֆրանսուա-Քսավյե Բիևիվիլը տեղական լրատվամիջոցներին ասել է, որ զոհերի թիվը կարող է զգալիորեն աճել, երբ իշխանությունները կարողանան գնահատել ավերածությունների մասշտաբները:
Նա նշել է, որ աղետի հետևանքով «մի քանի հարյուր» մարդ է մահացել, բայց թիվը կարող է աճել՝ հասնելով մի քանի հազարի։
Այժմ փրկարարները դեռ փորձում են հասնել որոշ տուժած շրջաններ։
Ենթադրաբար, «Շիդոյի» հարվածից մի շարք բնակավայեր հիմնովին ավերվել են։ Քամու արագությունը հասել է ժամում 225 կմ-ի։
Մայոտում ապրում են բազմաթիվ միգրանտներ, ովքեր ժամանել են Ֆրանսիայի տարածք ապաստան փնտրելու նպատակով: Ենթադրվում է, որ նրանք են ամենաշատը տուժել, քանի որ շատերն ապրում են ինքնաշեն ապաստարաններում։
Մայոտ կղզիների խմբի բնակչությունը կազմում է 320 հազար մարդ։
Տարածքի վարչական կենտրոնի՝ Մամուձու քաղաքի բնակիչներից մեկը Reuters-ին ասել է. «Ինձ թվում է միջուկային պատերազմի միջով անցանք: Մի ամբողջ տարածք անհետացավ իմ աչքի առաջ»։
Մայոտը գրեթե ամբողջությամբ կախված է Ֆրանսիայի ֆինանսական օգնությունից:
Ֆրանսիայից որոշ փրկարարներ արդեն աշխատում են Մայոտում։ Ֆրանսիայի ներքին գործերի նախարար Բրունո Ռետալյոն պետք է այցելի տարածք։
Կիրակի օրը «Շիդո» ցիկլոնը հարվածել է նաև Մոզամբիկին՝ ավերածությունների և էլեկտրաէներգիայի անջատումների պատճառ դառնալով մի քանի շրջաններում:
Ֆրանսիական զբոսաշրջության գործակալության պաշտոնական կայքում ասվում է, որ Մայոտ արշիպելագը «բուսական և կենդանական աշխարհի անհավատալի բազմազանության օրինակ է, իդեալական վայր նրանց համար, ովքեր սիրում են ուսումնասիրել ծովի խորքերը»:
