«Քաղաքացիական պայմանագիր» խմբակցության պատգամավոր Հովիկ Աղազարյանը չի պատրաստվում մանդատը վայր դնել։
«Խոր ափսոսանքով եմ նշում, որ ստիպված եմ մերժել մանդատը վայր դնելու վերաբերյալ ՀՀ վարչապետի խնդրանքը»,- 24News-ին տված մեկնաբանությունում տեղեկացրել է նա։
Ըստ նրա՝ իր կյանքի ծանրագույն որոշման համար այլ հիմնավորումներից բացի, «որոնք կարող են և սուբյեկտիվ լինել, և օբյեկտիվ», կա ևս երկու հանգամանք։
Առաջին, որ քրեական վարույթ է նախաձեռնվել ԱԺ լսումների ժամանակ տեղի ունեցած միջադեպի առիթով։ Լսումների ժամանակ Քննչական կոմիտեի այն ժամանակվա նախագահ Արգիշտի Քյարամյանը հայտարարել էր, որ Աղազարյանը միջնորդել է որդու մասնակցությամբ քրեական վարույթի գործով։
Երկրորդ հանգամանքն այն է, որ «քրեական վարույթ է հարուցված նաև մանր եղջերավոր անասունների արտահանման հետ կապված ինչ-որ գործով, որտեղ ես ներգրավված եմ որպես վկա»։
Աղազարյանը նշում է, որ եթե ընդուներ մանդատից հրաժարվելու վարչապետի խնդրանքը, ապա վարույթի ընթացքում եթե պարզվի, որ մեղավոր չէ, ապա հասարակության մոտ կարող է տպավորություն ստեղծվել, որ իրեն ինչ-որ գործարք է առաջարկվել։
«Եթե պարզվի, որ մեղավոր եմ, կզրկվեմ մանդատից»,- ասել է Աղազարյանը։
Աղազարյանը նաև նշել է, որ խմբակցությունը կարող է քննարկել, և իրեն հեռացնել։ Նաև չի բացառում, որ մանդատը վայր չդնելու իր այս որոշումից հետո Գլխավոր դատախազը կարող է մտնել խորհրդարան ու առաջարկել իրեն զրկել անձեռնմխելիությունից։
