Ավելի քան երեք տասնյակ դեմոկրատ և հանրապետական օրենսդիրներ Բայդենի վարչակազմին կոչ են անում գաղտնի քննարկում կազմակերպել ՀԱՄԱՍ-ին Թուրքիայի աջակցության վերաբերյալ՝ մտավախություն հայտնելով, որ խմբավորումը կարող է իր կենտրոնակայանը տեղափոխել ՆԱՏՕ-ի դաշնակից երկիր, գրում է The Hill-ը:
Օրենսդիրները հինգշաբթի օրը նամակ են հղել պետքարտուղար Էնթոնի Բլինքենին և Ազգային հետախուզության տնօրեն Ավրիլ Հեյնսին՝ խնդրելով գաղտնի ճեպազրույց անցկացնել՝ քննարկելու այն լուրերը, որ Քաթարից վտարված ՀԱՄԱՍ-ի պաշտոնյաներին ողջունում են Թուրքիայում:
Թուրքիայի նախագահ Ռեջեփ Թայիփ Էրդողանը երկար ժամանակ հանրային աջակցություն է ցուցաբերում ՀԱՄԱՍ-ի քաղաքական ղեկավարությանը և հաճախ հանդիպումներ է ունենում Անկարայում խմբավորումների առաջնորդների հետ։
Կոնգրեսականները նշում են, որ Թուրքիայի երկարամյա առաջնորդը զինյալներին անվանել է «ազատագրական խումբ», իսկ Իսրայելի վարչապետ Բենիամին Նեթանյահուին «Հիտլեր» որակումն է տվել՝ Գազայի հատվածում լայնածավալ ավերածությունների և պաղեստինցիներին սպանելու համար:
«Նախագահ Ռեջեփ Թայիփ Էրդողանի պաշտոնավարման ընթացքում Թուրքիայի հարաբերությունները ՀԱՄԱՍ-ի հետ երկար ժամանակ մտահոգիչ են եղել»,- գրել են օրենսդիրները։
«ՀԱՄԱՍ-ի կենտրոնակայանը ՆԱՏՕ-ի դաշնակից Թուրքիա հնարավոր տեղափոխման մասին լուրերը խորապես մտահոգիչ են և կտրուկ սրում են խմբավորման հետ Թուրքիայի հարաբերությունների վերաբերյալ առկա մտահոգությունները: Հաշվի առնելով այս մտահոգությունները՝ խնդրում ենք անհապաղ քննարկում կազմակերպել»,- ասել են օրենսդիրները:
