Արդարադատության միջազգային դատարանը հրապարակել է «Հայաստանն ընդդեմ Ադրբեջանի» գործով Ադրբեջանի ներկայացրած նախնական առարկությունների վերաբերյալ վճիռը։
Դատարանը մերժել է Ադրբեջանի երկու առարկությունները։ Առաջին առարկությունը մերժվել է 16 կողմ, 1 դեմ ձայների հարաբերակցությամբ, երկրորդ առարկությունը՝ 15 կողմ, 2 դեմ ձայնով։
Դատարանը հաստատել է, որ Կոնվենցիայի 22-րդ հոդվածով նախատեսված նախապայմանները բավարարված են: Մասնավորապես, Հայաստանը բանակցություններ է վարել Կոնվենցիայի մեկնաբանման և կիրառման շուրջ, սակայն բանակցություններն անարդյունավետ են եղել, քանի որ կողմերի նախնական դիրքորոշումները մնացել են անփոփոխ․ Ադրբեջանը շարունակել է մերժել Հայաստանի պնդումները։
2021 թվականի սեպտեմբերի 16-ին Հայաստանը վարույթ էր նախաձեռնել Ադրբեջանի դեմ՝ կապված «Ռասայական խտրականության բոլոր ձևերի վերացման մասին» միջազգային կոնվենցիայի ենթադրյալ խախտումների հետ: Հայաստանը Ադրբեջանին մեղադրում է հայերի դեմ գործած հանցագործությունների համար, այդ թվում՝ սպանություններ, խոշտանգումներ, անմարդկային վերաբերմունք։ Ադրբեջանը հակընդդեմ հայց էր ներկայացրել Հայաստանի դեմ։
