ԱՄՆ նախագահական ընտրությունների երկու թեկնածուները՝ դեմոկրատ Քամալա Հարիսը և հանրապետական Դոնալդ Թրամփը քվեարկության օրվանից մեկ օր առաջ նախընտրական միջոցառումներ են անցկացրել չկողմնորոշված նահանգներում, որոնց քվեներից կախված է ընտրությունների ելքը:
Հարրիսը քարոզարշավ է իրականացրել Միչիգանում, իսկ Թրամփն այցելել է Փենսիլվանիա, Հյուսիսային Կարոլինա և Ջորջիա:
Հարրիսն Իսթ Լանսինգում հանրահավաքի ժամանակ խոստացել է «շրջել վախով և տարաձայնություններով առաջնորդվող տասնամյա քաղաքականության էջը» :
«Մենք դրան վերջ ենք դնում, ուժասպառ ենք դրանից», — ասել է նա աջակիցներին:
Հարիսը գալիք ընտրություններն անվանել է «մեր կյանքի ամենակարևոր ընտրություններից մեկը» և վստահություն հայտնել, որ ինքը կհաղթի Սպիտակ տան համար պայքարում:
Թրամփը Հյուսիսային Կարոլինայի Քինստոն քաղաքում անցկացված հանրահավաքում նույնպես վստահորեն խոսել է ընտրություններում իր հաղթանակի մասին:
«Որովհետև մենք ունենք մեծ, գեղեցիկ առավելություն: Մեզ մնում է երեքշաբթի օրը դուրս գալ և քվեարկել, քվեարկել, քվեարկել: Մենք հաղթելու ենք այն», — ասել է նա:
Ավելի քան 78 միլիոն ամերիկացի վաղաժամկետ քվեարկել է նախագահական ընտրություններում: Այս մասին են վկայում կիրակի երեկոյան Ֆլորիդայի պետական համալսարանի հրապարակված տվյալները:
Ավելի քան 42,6 մլն մարդ անձամբ է այցելել ընտրատեղամասեր, մոտ 35,3 մլն-ը քվեարկել է փոստով։
ԱՄՆ-ում գրանցված ընտրողների ընդհանուր թիվը մոտավորապես 168 միլիոն է: Առավել մեծ ակտիվություն է գրանցվել Տեխասում (8,9 միլիոն ձայն), Ֆլորիդայում (8,1 միլիոն), Կալիֆոռնիայում (7,6 միլիոն), Հյուսիսային Կարոլինայում (4,4 միլիոն):
ԱՄՆ-ում ընտրությունները տեղի կունենան նոյեմբերի 5-ին։ Հանրապետական Դոնալդ Թրամփը և դեմոկրատ Քամալա Հարիսը կպայքարեն պետության ղեկավարի պաշտոնի համար։
Թրամփը եղել է Ամերիկայի 45-րդ նախագահը (2017-2021 թթ.): Նա պարտվել է 2020 թվականի ընտրություններում դեմոկրատ Ջո Բայդենին և այժմ փորձում է վերադառնալ Սպիտակ տուն: Հարրիսը փոխնախագահի պաշտոնը զբաղեցնում է 2021 թվականի հունվարից։
