COP29-ը ոչ թե հնարավորություն է, այլ սկանդալ՝ Եվրախորհրդարանում հայտարարել է ֆրանսիացի պատգամավոր Ֆրանսուա-Քսավյե Բելամին:
Ելույթ ունենալով Ադրբեջանում մարդու իրավունքների իրավիճակի և Հայաստանի հետ հարաբերությունների վերաբերյալ բանավեճին՝ նա ընդգծել է, որ ժամանակն է, որ Եվրոպան վերջապես դուրս գա իր անգիտակից վիճակից։ «COP 29-ը հնարավորություն չէ: COP 29-ը սկանդալ է, խայտառակություն, որը կխաթարի շրջակա միջավայրը պահպանելու հանձնառության պատմությունը մի երկրում, որից մենք գազ ենք գնում, և սա մեր հավաքական վախկոտության ևս մեկ դրսևորում է», — ասել է Բելամին:
«Ժամանակն է դատապարտել գազային համաձայնագիրը, որը կապում է Եվրահանձնաժողովին Ադրբեջանի հետ, անհրաժեշտ պատժամիջոցներ կիրառել պարոն Ալիևի և նրա ռեժիմի դեմ և վերջապես ասել, որ ժողովրդավարությունը և Եվրոպայի բաբախող սիրտը հայ ժողովրդի կողքին են, նրանց, ովքեր պայքարում են հանուն ազատության, հանուն խաղաղության, հանուն անվտանգության Կովկասի այս տարածաշրջանում, ինչպես նաև ամբողջ աշխարհում»,- ասել է պատգամավորը:
«Պարոն Ալիև, եթե այդքան հավատում եք ձեր սեփական ուժերին, ինչո՞ւ եք փորձում լռեցնել ձեզ մարտահրավեր նետողների ձայները: Եթե այդքան հավատում եք ձեր լեգիտիմությանը, ինչո՞ւ եք բռնություն կիրառում» — նշել է Բելամին։
