ՄԱԿ-ի Պաղեստինի փախստականների գործակալությունը, Արդարադատության միջազգային դատարանը և ՄԱԿ-ի ղեկավար Անտոնիո Գուտերեշն այս տարվա Խաղաղության Նոբելյան մրցանակի ֆավորիտներից են՝ հայտնում է Reuters-ը։
Նորվեգիայի Նոբելյան կոմիտեն կարող է անակնկալ մատուցել հոկտեմբերի 11-ի հայտարարությամբ, կարող է նույնիսկ մրցանակ չշնորհել:
Բուքմեյքերներն այս տարվա մրցանակը շահելու ֆավորիտ էին համարում Ալեքսեյ Նավալնիին, որը մահացել է փետրվարին Արկտիկայի գաղութներից մեկում: Բայց դա հնարավոր չէ, քանի որ նա չի կարող մրցանակը ստանալ հետմահու։
Բուքմեյքերների մեկ այլ ֆավորիտ՝ ուկրաինացի Վլադիմիր Զելենսկին, դժվար թե հաղթի, քանի որ նա պատերազմող երկրի առաջնորդն է:
«ՄԱԿ-ի Պաղեստինի փախստականների գործակալությունը կարող է լինել այդպիսի թեկնածուներից մեկը: Նրանք չափազանց կարևոր աշխատանք են կատարում պաղեստինցիների համար, որոնք տառապում են Գազայի պատերազմի պատճառով», — Reuters-ին ասել է Օսլոյի Խաղաղության հետազոտությունների ինստիտուտի տնօրեն Հենրիկ Ուրդալը:
ՄԱԿ-ի Պաղեստինի փախստականների գործակալությանը տրվող մրցանակը հակասական կլինի, հավելել է նա՝ հաշվի առնելով Իսրայելի կողմից հնչեցրած պնդումները, որ դրա աշխատակիցներից ոմանք մասնակցել են 2023 թվականի հոկտեմբերի 7-ին ՀԱՄԱՍ գրոհայինների կողմից Իսրայելի հարավում տեղի ունեցած հարձակմանը։
Օգոստոսին ՄԱԿ-ի ներքին հետաքննությունը հայտնել էր, որ ինը աշխատակիցներ կարող են ներգրավված լինել հարձակմանը և հեռացվել են աշխատանքից:
ՄԱԿ-ի Պաղեստինի փախստականների գործակալությունը հայտարարել է, որ Իսրայելը փորձում է կազմակերպությունը լուծարել: Գործակալությունը, որը հիմնվել է 1949 թվականին Իսրայելի ստեղծման շուրջ պատերազմի հետևանքով, մարդասիրական օգնություն է տրամադրում միլիոնավոր պաղեստինցիներին Գազայի հատվածում, Հորդանան գետի Արևմտյան ափին, Հորդանանում, Սիրիայում և Լիբանանում:
