ԱՄՆ Եվրոպական հրամանատարությունը X-ում հրապարակել է լուսանկար՝ անդրադառնալով հուլիսի 15-24-ը Հայաստանում կայանալիք համատեղ հայ-ամերիկյան զորավարժություններին:
«Հայաստանն ու ԱՄՆ-ն, «Արծիվ գործընկեր-2024»-ի շրջանակում, հուլիսի 15-24-ը կմիավորեն ուժերը Հայաստանում: Խաղաղապահական հմտությունների կատարելագործում հրետանային պատրաստության, կայունության ուսուցման և զենքի ճանաչման միջոցով: Ավելի ամուր գործընկերության կառուցում՝ հանուն համաշխարհային անվտանգության», — գրված է լուսանկարին կից:
🇦🇲🇺🇸 Armenia & the U.S. will join forces for #EaglePartner24 in #Armenia, July 15-24! 🦅 Enhancing peacekeeping skills through gunnery, stability training & weapons familiarization. Building stronger partnerships for global security! #ReadyandPostured 🤝🌍@ArmeniaMODTeam pic.twitter.com/J79T5AYSXA
— U.S. European Command (@US_EUCOM) July 8, 2024
Ավելի վաղ հաղորդվել էր, որ միջազգային խաղաղապահ առաքելություններում մասնակցության նախապատրաստման շրջանակում հուլիսի 15-24-ը Հայաստանում կանցկացվի «Արծիվ գործընկեր-2024» հայ-ամերիկյան համատեղ զորավարժությունը։
Զորավարժությանը ներգրավված են լինելու ՀՀ ԶՈՒ խաղաղապահ բրիգադի, Եվրոպայում և Աֆրիկայում ԱՄՆ ցամաքային զորքերի և Կանզասի ազգային գվարդիայի զինծառայողները:
Զորավարժությունը ենթադրում է խաղաղապահ առաջադրանքների ընթացքում հակամարտող կողմերի միջև կայունացման գործողություններ։
Զորավարժության նպատակն է բարձրացնել միջազգային խաղաղապահ առաքելությունների մասնակցող ստորաբաժանման փոխգործակցելիության մակարդակը խաղաղապահ գործողությունների շրջանակում, իրականացնել կառավարման և մարտավարական հաղորդակցման լավագույն փորձի փոխանակում, ինչպես նաև բարձրացնել հայկական ստորաբաժանման պատրաստվածությունը:
Խաղաղապահ առաքելությունների նախապատրաստության շրջանակում միջազգային խաղաղապահ գործողությունների համար նախապատրաստվող ստորաբաժանումները պարբերաբար մասնակցում են նմանօրինակ համատեղ զորավարժությունների և վարժանքների գործընկեր երկրներում:
