Շիական շարժումը՝ Իրաքի իսլամական դիմադրությունը, ստանձնել է Հորդանան-սիրիական սահմանին ամերիկյան ռազմաբազայի վրա անօդաչու թռչող սարքի հարձակման պատասխանատվությունը, հայտնում է The Washington Post-ը՝ հղում անելով խմբավորման ղեկավարության անանուն աղբյուրին։
Լրատվամիջոցի զրուցակիցը, որը ցանկացել է անանուն մնալ, ասել է, որ իրաքյան շարժումը, միավորելով մի քանի խմբավորումներ, ստանձնում է հարձակման պատասխանատվությունը։ «Մեզ չեն մտահոգում ԱՄՆ պատասխան սպառնալիքները», — թերթին ասել է շարժման խոսնակը:
Associated Press-ի աղբյուրները հաստատել են, որ հարվածն իրականացրել է Իրաքում գտնվող խմբավորումներից մեկը, սակայն անունը չեն նշել։
Ավելի վաղ ՄԱԿ-ում Իրանի մշտական ներկայացուցիչը IRNA գործակալությանը հայտնել էր, որ Իսլամական Հանրապետությունը կապ չունի Հորդանանի եւ Սիրիայի սահմանին գտնվող ամերիկյան բազայի վրա հարձակման հետ։
Հունվարի 28-ին ԱՄՆ կենտրոնական հրամանատարությունը հայտնել է, որ իրանամետ խմբավորումների կողմից անօդաչու թռչող սարքի հարձակման արդյունքում երեք ամերիկացի զինվոր է զոհվել, 34-ը՝ վիրավորվել։ Պենտագոնի ղեկավար Լլոյդ Օսթինը խոստացել է հակահարված տալ Իրանի կողմից աջակցվող խմբավորումներին «ճիշտ ժամանակին, ճիշտ տեղում»: Ինչպես հաղորդում է Al Hadath հեռուստաալիքը, հարձակումն իրականացվել է T-22 օբյեկտի վրա։ Այն գտնվում է ամերիկացի զինվորականների ճամբարի կողքին, որոնք օգնում են Հորդանանին սահմանի ամրապնդման հարցում։ Նշվում է, որ այժմ պարզում են, թե ինչու սիրիական Ալ-Թանֆ շրջանում տեղակայված բազայում ՀՕՊ համակարգերը չեն կարողացել կանխել անօդաչու թռչող սարքի հարձակումը։
