Գարնանը Հայաստանը մեկ ամսով կվերածվի Մարսի հետազոտական կենտրոնի

Ավստրիայում Հայաստանի դեսպանությունում այսօր հյուրընկալվել էին 2024թ. Հայաստանում Հայկական տիեզերական ֆորումի և Ավստրիական տիեզերական ֆորումի (OeWF) հետ համագործակցությամբ անցկացվելիք «AMADEE-24» դեպի Մարս 14-րդ միջազգային սիմուլյացիայի հայկական և ավստրիական կազմակերպչական թիմերի անդամները։

Դեսպան Պապիկյանն իր խոսքում ուրախությամբ նշել է, որ Հայաստանը գարնանը մեկ ամսով կդառնա Մարսի հետազոտական կենտրոն։ Ընդգծելով «AMADEE-24» սիմուլյացիայի գիտակրթական կարևոր նշանակությունը՝ դեսպանը շնորհակալություն է հայտնել Ավստրիական տիեզերական ֆորումին Հայաստանը որպես հյուրընկալող երկիր ընտրելու համար:

Ավստրիական տիեզերական ֆորումը (OeWF) Հայաստանն ընտրել է որպես հյուրընկալող երկիր` դեպի Մարս առաքելության մոդելավորման համար։ AMADEE24 վարժանքները կանցկացվեն 2024 թվականի մարտին։ Սիմուլյացիայի շրջանակում միջազգային անձնակազմը մեկ ամիս շարունակ կմարզվի ժայռոտ բարձրադիր սարահարթում, որը շատ առումներով նման է Մարսի վրա գտնվող սարահարթերին։ Սա կլինի OeWF-ի կողմից իրականացվող 14-րդ մոդելավորումը, որոնց ընթացքում տեխնոլոգիաներ են փորձարկվում ապագայում դեպի Մարս հետազոտական առաքելություն ուղարկելու նպատակով:

Առաքելություններն օգնում են փորձարկել նյութերը, վերլուծել համակարգի թերությունները և գտնել լուծումներ:

Առաքելության անձնակազմն արդեն որոշված է. մոդելավորմանը կմասնակցեն երկու կին և չորս տղամարդ Ավստրիայից, Գերմանիայից, Իսրայելից, Իտալիայից և Մեծ Բրիտանիայից։ Գերմանիայից Անիկա Մեհլիսը կլինի առաջին կինը, որը կգլխավորի առաքելությունը:

2023 թվականի ապրիլին Ավստրիական տիեզերական ֆորումի պատվիրակությունն այցելել էր Հայաստանում AMADEE24 վայր։