Արդարադատությունը չի կարող իրականացվել առանց դատական ակտերի կատարման. այսօր ԴԱՀԿ օրն է
Աիդա Ավետիսյան
«Ռադիոլուր»
Մայիսի 5-ը Դատական ակտերի հարկադիր կատարողի օրն է: Այսօր Հարկադիր կատարողը նշում է կառույցի ստեղծման 16-ամյակը: Տոնի առթիվ կառույցի աշխատակիցներին շնորհավորեց Հայաստանի գլխավոր հարկադիր, գեներալ-մայոր Միհրան Պողոսյանը: Նրա շնորհավորանքներին միացավ նաև Լեռնային Ղարաբաղի գլխավոր հարկադիր Ֆելիքս Գաբրիելյանը:
«Մեծ պարտավորություններով ու եռանդով». այսպես է իր գործունեությունը ծավալում Դատական ակտերի հարկադիր կատարումն ապահովող ծառայությունը: Գրանցած հաջողություններն էլ նկատելի են` 2 միլիարդ դրամ բռնագամնձումից հասցնելով 20 միլիարդի։ «Սա մեծ հաջողություն է, ավելին ասեմ՝ անձնակազմի ավելացում գրեթե չի եղել։ Այս ամենը տեղի է ունեցել տեղեկատվական տեխնոլոգիաների ներդրման շնորհիվ։ Մենք կարողացել ենք աշխատել օնլայն ռեժիմով և մեր բոլոր արգելանքների համակարգն իրականացնել այս ձևով»,- ասում է Միհրան Պողոսյանը։
2015 թվականին էլ կառույցը կինտեգրվի հարկադիր կատարողների միջազգային միությանը, որտեղ ընդգրկված են 80 երկրի գործընկեր կառույցներ: Հետխորհրդային երկրների հետ համեմատ մեր դատական ակտերի հարկադիր կատարումն ապահովող ծառայությունը առաջընթաց է գրանցել և փորձի փոխանակման արդյունքում կօժանդակի այդ երկրներին:
Արդարադատության արդյունավետության երաշխավորը հարկադիր կատարողներն են, իր խոսքում նշեց արդարադատության նախարարի առաջին տեղակալ Գրիգոր Մուրադյանն ու ավելացրեց, որ որևէ արդարադատություն չի կարող իրականացվել առանց դատական ակտերի կատարման:
