ԿարևորՀասարակություն

Հանրապետության հրապարակի շենքերի մեծ տրամաչափի անցքերը 2022թ․-ի ձևավորման հետևանքը չեն

Հանրապետության հրապարակի շենքերի մեծ տրամաչափի անցքերը, քարերի վնասվածքներն ու մեխերը անցյալ տարի անցկացված ամանորյա լուսավորության հետևանքը չեն: Այդ մասին փաստում են համացանցում առկա արխիվային լուսանկարները։ Փոխքաղաքապետ Սուրեն Գրիգորյանը տեղում հերթով անդրադառնում է լրատվամիջոցներում հրապարակված կադրերին։

«2016 թվականի քարտեզում պարզ երևում են այն անցքերը, որոնք կան նաև այսօր: Հետևաբար դրանք չէին կարող նախորդ տարի արվել: Բացի այդ, տվյալ հատվածում լուսավորություն չի անցկացվել»,-նշում է Սուրեն Գրիգորյանը:

Ամանորյա ձևավորման համար 2022թ․ շենքերի վրա բացված բոլոր անցքերը խնամքով փակվել են` օգտագործելով նույն քարի հատուկ փոշի։ Այսօր շատ դեպքերում դժվար է անգամ գտնել ու տարբերակել՝ եղե˚լ է արդյոք տվյալ հատվածում միջամտություն , թե՝ ոչ։

ՀՀ վաստակավոր ճարտարապետ Հայկ Ասատրյանը նշում է, թեև իր կարծիքով հրապարակի շենքերը լրացուցիչ հատուկ լուսավորության կարիք չունեն, բայց նաև շենքերի վրայի միջամտությունները նոր չեն. «Դեռևս խորհդրային տարիներին փակցվում էին տարբեր պաստառներ: Այդ պատճառով էլ անցքերը մնացել են, չեն փակվել ժամանակին: Ասել, որ դրանք անցյալ տարվանից են՝ առնվազն ճիշտ չէ»:

Այս տարի հրապարակի լուսավորությունը կանցկացվի մետաղական հատուկ կոնստրուկցիաներով: Ամեն մեկը շենքին կամրանա 2-3 տեղից։ Սուրեն Գրիգորյանն ընդգծում է՝ քաղաքային իշխանությունը կարևորում է պատմամշակութային շենքերի պահպանությունը:

Քաղաքի համար այցեքարտ համարվող շենքերը տոնական օրերին ձևավորելն ու լուսավորելը տարածված է ամբողջ աշխարհում։

Back to top button