Քննարկվել են Դիլիջանի և Պուշկինի թունելների հետազոտությունների արդյունքները․ ուշադրության կենտրոնում թունելների անվտանգության հարցն է

Նոյեմբերի 17-ին և 18-ին «Ճանապարհային դեպարտամենտ» հիմնադրամում տեղի է ունեցել խորհրդակցություն‚ որի ընթացքում ներկայացվել են Դիլիջանի և Պուշկինի թունելների մանրամասն հետազոտությունների արդյունքները։ Թունելների մանրամասն հետազոտման, ինչպես նաև հիմնանորոգման ու արդիականացման նախագծային աշխատանքների իրականացման նպատակով պայմանագիր է կնքվել «ԲԵՌՆԱՐԴ Գրուպ ԶեդԹի ՋիԷմԲիԷյչ (Ավստրիա) և «Ակտես ԲԵՌՆԱՐԴ» ՋիԷմԲիԷյչ (Ավստրիա) համատեղ ձեռնարկության հետ (ենթախորհրդատուներ՝ «Տրանսնախագիծ» ՓԲԸ և ԷմՍի Մոբիլիթի Քոնսալթնթս ՋիԷմԲիԷյչ)։

Խորհրդակցությանը մասնակցել են ՀՀ տարբեր գերատեսչությունների‚ Ճարտարապետության և շինարարության Հայաստանի ազգային համալսարանի‚ Ասիական զարգացման բանկի ներկայացուցիչներ‚ ճանապարհաշինարարներ‚ նախագծողներ։

ՀՀ ՏԿԵ նախարարի տեղակալ Քրիստինե Ղալեչյանը‚ ողջունելով ներկաներին կարևոր մասնագիտական քննարկմանը‚ տեղեկացրել է‚ որ թունելների վերականգնումը ներառված է ՀՀ կառավարության ծրագրում։ Նա ընդգծել է‚ որ պետք է հատուկ ուշադրություն դարձվի թունելների անվտանգության բարձրացմանը։ Ըստ նրա՝ ամեն ինչ արվում է ՀՀ մասնագիտական հանրույթին ևս ներգրավելու նախագծման փուլին՝ լսելու նրանց կարծիքները թունելների կառուցման‚ վերականգնման‚ պահպանման‚ սպասարկման ուղղությամբ։

«Ճանապարհային դեպարտամենտ» հիմնադրամի գործադիր տնօրեն Գոռ Ավետիսյանն ընդգծել է‚ որ Դիլիջանի և Պուշկինի թունելներն այս պահին Հայաստանի ամենաերկար թունելներն են‚ որոնց վերականգնումը մեծ կարևորություն ունի ՀՀ տնտեսության‚ տրանսպորտային ենթակառուցվածքի համար։ Երկու թունելներն էլ գտնվում են միջպետական ճանապարհների վրա։ Հատկապես Դիլիջանի թունելով երթևեկությունը բավականին ինտենսիվ է‚ և երկար տարիներ չնորոգվելով՝ այս թունելները հայտնվել են անմխիթար վիճակում։ Պարոն Ավետիսյանը հույս է հայտնել‚ որ մասնագիտական քննարկման արդյունքում վեր կհանվեն բոլոր խնդիրները‚ ինչը կնպաստի‚ որպեսզի առաջիկա տարիներին ունենանք բարձր չափանիշներին համապատասխանող թունելներ։

Հանդիպման ընթացքում խորհրդատու կազմակերպությունը ներկայացրել է թունելների և դրանց ինժեներական համակարգերի ներկա վիճակը, համապատասխանությունը Հայաստանում գործող և միջազգային տեխնիկական ու անվտանգային ստանդարտներին։ Քննարկվել են վերականգնողական միջոցառումների տարբերակներ։