Ռուսական կողմը պատրաստ է շարունակել հնարավորինս աջակցել Լեռնային Ղարաբաղի հակամարտության կարգավորմանը և հուսով է, որ կողմերի միջև բանակցություններն արդյունավետ կլինեն՝ ասել է ՄԱԿ-ում Ռուսաստանի Դաշնության մշտական ներկայացուցչի տեղակալ Դմիտրի Պոլյանսկին։
«Ակնկալում ենք, որ Բաքվի և Ստեփանակերտի ներկայացուցիչների միջև շփումները արդյունավետ կլինեն և թույլ կտան մեզ անհապաղ միջոցներ ձեռնարկել տարածաշրջանում հումանիտար ճգնաժամը շտկելու և Ղարաբաղի բնակչության համար կայուն կենսապայմաններ ապահովելու համար: Մենք ամեն կերպ կնպաստենք դրան»,- ասել է նա՝ ելույթ ունենալով Լեռնային Ղարաբաղի հարցով ՄԱԿ-ի Անվտանգության խորհրդի նիստում։
«Լեռնային Ղարաբաղի հայերի անվտանգության հարցը առանցքային նշանակություն ունի»,- նշել է դիվանագետը։
Պոլյանսկին ընդգծել է, որ «այժմ բացարձակ առաջնահերթությունն է կանխել ռազմական գործողությունների վերսկսումը և իրավիճակը վերադարձնել քաղաքական ու դիվանագիտական դաշտ»։
Նրա խոսքով, «Ռուսաստանի Դաշնությունը շարունակում է առաջատար դեր խաղալ Ադրբեջանի և Հայաստանի միջև հարաբերությունների կարգավորման գործընթացում և բոլորից ավելի շահագրգռված է տարածաշրջանում ճգնաժամային իրավիճակի շուտափույթ հանգուցալուծմամբ»։
