Արմավիրցի Մանյա տատիկի երկարակեցության գաղտնիքը բարությունն ու հյուրասիրություն է, առողջ ապրելակերպը
Սաթիկ Իսահակյան
«Ռադիոլուր»-Արմավիրի մարզ
Արմավիր քաղաքի բնակիչ 99 ամյա Մանյա Բայազետյանը հարուստ կենսագրություն ունի, հյուրասեր ու ընկերասեր է, շարուժանակ, ապրում է հարազատների սիրով շրջապատված, անհրաժեշըության դեպքում` օգնության ձեռք մեկնում, իսկ երկարակեցության գաղտնիքը հոգու բարությունն է, առողջ սննդակարգը
99 ամյա Մանյա տատիկի տարիքը դժվար էր կռահել անմիջապես և հավատալ, որ նա 9 ամսից կնշի իր 100 ամյակը: Մանյա Բայազետյանը լավ տեսողություն և լսողություն ունի, միակ դժգոհությունը հիշողությունն է, որը վերջերս սկսել է իրեն դավաճանել: Մանյա տատիկը թեև երկար տարիներ ապրում է Արմավիր քաղաքում, սակայն միշտ իրեն սարդարապատցի է համարում, իսկ խոսքի յուրաքանչյուր մեջբերումը կապված են իր գերդաստանի հետ.« Ես շատ լավ եմ ապրել, ոչխարի ու կովի կաթով, պանրով, մածնով ու կարագով եմ սնվել, ինձ թարմ կյանքով են պահել»:
Առողջ ապրելակերպն ու ժառանգաբար փոխանցված գենետիկական կոդը Մանյա Բայազետյանի երկարակեցության գաղտնիքն է, նրա նախնիները նույնպես երկար են ապրել 2 տատիկներից մեկը 102 տարի, մյուսը` 97: Մանյա տատիկը օրը սկսում է այնպես, ինչպես բոլորը, ինքնուրույն հագնվում է, հարդարվում, դիմում սիրոջ օգնությանն ու սրճում հարազատների հետ:
Մանյ ա Բայազետյանը շատ ընկերասեր ու բարեկամասեր է, տան դռները միշտ բաց են հյուրերի առջև, հյուրասիրությամբ` սկեսրոջ խորհրդին է հետևել, «Տանդ դռները բաց արա հյուրերի առջև, հյուրասիրիր` ճանապարհիր, եթե ոչինչ չունես, ապա մեկ բաժակ ջուր առաջարկիր նրան» ,- խորհուրդը փոխանցում է նաև իր սերունդներին:
Տատիկը հպարտանում է իր հորեղբայրներով, որոնք ուսյալ մարդիկ են եղել, նշում է, որ Արմավիրի մարզի Նորապատ գյուղի հատակագիծը հորեղբոր ձեռքի գործն է: Մանյա Բայազետյանը հպարտանում է նաև իր զավակներով.«5 երեխա ունեմ և 15 թոռ»:
Հարուստ կենսագրություն ունեցող տատիկն աշխույժ կյանքով է ապրել, իսկ հիմա վայելում է վաստակած հանգիստը: Նա ակտիվորեն հետևում է քաղաքական անցուդարձին, տալիս իր գնահատականը, իսկ միակ ցանկությունը` աշխարհի խաղաղությունն է, երկրի տնտեսության բարելավումը և օտարության մեջ գտնվող ղարիբների տունդարձը: Կանանց միամսյա տոնի կապակցությամբ 99 ամյա տատիկն իր բարեմաղթանքը հղեց բոլորին, ցանկացավ` առողջություն և երկար տարիների կյանք:
Տատիկի երկարակեցության գաղտնիքներից ամենակարևորը բարու սերմնացան լինելն է, «Չարն ու նախանձը ետ մղենք ու բարուն ընդառաջ գնանք»,- ասում է նա :
Թող բարին տիրի բոլորիս հոգիներում:
