ԿարևորՄշակույթ

Ներկայացվել է audiobook.am խոշորագույն հայերեն աուդիոդարանը

Այսօր Արարատյան Հայրապետական թեմի առաջնորդարանում տեղի է ունեցել audiobook.am կայքի շնորհանդեսը: Միջոցառմանը ներկա են եղել վարչապետ Տիգրան Սարգսյանը, ՀՀ մշակույթի նախարար Հասմիկ Պողոսյանը, ՀՀ գյուղատնտեսության նախարար Սերգո Երիցյանը, Երևանի քաղաքապետ Տարոն Մարգարյանը, պաշտոնատար այլ անձինք: Այս մասին հաղորդում են կառավարության լրատվական ծառայությունից:

Արարատյան Հայրապետական թեմի առաջնորդական փոխանորդ գերաշնորհ Տեր Նավասարդ արքեպիսկոպոս Կճոյանի օրհնությամբ տերունական աղոթքից հետո վարչապետ Սարգսյանը ողջունել ՀՀ կառավարության անունից և շնորհավորել է նախաձեռնության հեղինակներին:

«Այս ձեռնարկն ուղղված է նրան, որպեսզի կարողանանք ճիշտ օգտագործել մեր ազատ ժամանակը և ավելի մատչելի ձևով ծանոթանալ այն հարուստ պատմական ժառանգությանը, որ ստեղծել է մեր ժողովուրդը: Կարծում եմ, որ այն մեծ պահանջարկ կունենա սփյուռքում, որովհետև մեր հայրենակիցները կունենան լավագույն ստեղծագործությունները հայերենով լսելու բացառիկ հնարավորություն», — նշել է կառավարության ղեկավարը:

Մշակույթի և ժամանակակից նորարակական տեխնոլոգիաների համադրման այս գաղափարի հեղինակը Peoplemeter ընկերության նախագահ Նարեկ Մալյանն է: Նրա խոսքով՝ խոշորագույն հայերեն աուդիոդարանի ստեղծումը կարևոր դեր կունենա սփյուռքում հայապահպանության գործում և հնարավորություն կտա միավորել աշխարհասփյուռ հայերին: Նա տեղեկացրել է, որ շուրջ 2 տարվա աշխատանքի արդյունքում այժմ հասանելի է 300 աուդիոգիրք (հայ դասականներ, հոգևոր գրականություն), ևս 400-ը պատրաստման փուլում է:

1915 թ. Հայոց ցեղասպանության 100-ամյակի կապակցությամբ նախատեսված է ապրիլի 24-ին նահատակված գրողների աուդիոգրքերի ձայնագրում:

Back to top button