ԿարևորՀասարակություն

24 Ապրիլը մայր հողի վրայ ուրիշ է․ Ղուկաս Արզումանը եկած էր Պոլիսէն 

Ղուկաս Արզումանը ընտանեօք եկած էր Երեւան քանի մը օրով միայն ․․․

 «Հայաստանի մէջ ըլլալ մեզի համար միշտ ուրիշ զգացում մըն է, 108 տարիներ առաջ հայ ժողովուրդը ճամբորդութեան մը ելաւ ու դեռ կը քալենք․․․ մինչեւ ո՞ւր , ո՞ւր պիտի ըլլայ  մեր վերջին կայանը ․․․ե՞րբ հանգիստ պիտի նստինք, Հայաստանը այնպէս մը փայլի , որ իր որբերը հաւաքէ․․ սա է իմ աղօթքս»,- ըսաւ Ղուկաս։

Ղուկասի կինը` Մարին, Պոլսոյ մէջ Գարակէոզեան վարժարանի միջնակարգ դասարաններու ուսուցչուհին է։ «Աս չորրորդ այցելութիւնս է հայրենիք, բայց այս օրը, այս մթնոլորտը բացառիկ է ինծի համար, հասկնալի ձեւով ուրախութիւն մը չէ , բայց մեծ բախտ մըն է»։

«Երբոր Հայաստան գամ, կը զգամ թէ ես հայ եմ, կը սիրեմ կոր Հայաստանը»,- ըսաւ իրենց անուշիկ աղջիկը` Նորինը։

24 Ապրիլը 24 Ապրիլն է ․․․կրկնեց Ղուկաս Արզուման։

«Հոնտեղ, դժբախտաբար, շատ բաներ չենք կրնար ընել»,- շարունակեց ան, նկատի ունէր Թուրքիոյ մէջ։

Մենք նաեւ Հայաստան –Թուրքիա սահմանի բացման մասին խօսեցանք։ Պոլսոյ հայութիւնը, ըստ Ղուկասի, շատ դրական տրամադրուած են  եւ բոլորը յոյսով կը սպասեն։

«Ասիկա մեծ քայլ մը պիտի ըլլայ։ Այս յարաբերութիւններու մասին մենք  տարիներով ամենամօտը Հայաստանին եւ այս արգելքներու պատճառով ամենահեռուն մնացինք, սահմանի բացումով աւելի պիտի մօտենանք, այդ կարծիքը ունինք եւ այդ  յոյսով կը սպասենք»,- ըսաւ Ղուկաս։

Ինչպէս գիտենք, սոյն թուականի  14 Մայիսին Թուրքիոյ նախագահին ընտրութիւններն են։ «Մեր հայութեան  համար նախագահի փոփոխութեամբ շատ բան պիտի չփոխուի, շատ մը կալուածներ կրցանք ետ առնել  այս նախագահի օրոք, դեռ  շատ բաներ  ալ ունինք ձեռք ետ առնելիք, ապագան ինչ կը բերէ, չենք գիտեր, տակաւին ուրիշ դատեր ալ կան, ատոնք ալ կը հետապնդենք։  Մենք` հայերս, յոյսով եւ հաւատքով կ՛ապրինք, այն հաւատքով ու յոյսով, թէ օր մը պիտի գայ, ինչ որ կորսնցուցինք` բացի անհատներէն, ատոնք ետ պիտի դառնան»։

Back to top button