Արմավիրի մարզի սահմանամերձ Երվանդաշատ գյուղի երեխաներն այսուհետ դպրոց կհաճախեն նախապատրաստված ու նախադպրոցական կրթություն ստացած: Երվանդաշատի մշակույթի տան մի հատվածը 2020թ սուբվենցիոն ծրագրով վերակառուցվել է մանկապարտեզի: Շինարարությունն ավարտվել էր երկու տարի առաջ, սակայն գույքի, սարքավորումների և մասնագետների պակասի պատճառով չէր շահագործվում: Այժմ բացը լրացվել է և Թուրքիային սահմանակից Բագարան և Երվանդաշատ գյուղերի երեխաներն առաջին անգամ հաճախում են մանկապարտեզ:
Արմավիրի մարզի սահմանամերձ Երվանդաշատ համայնքում մանկապարտեզի բացումը տոնի էր վերածվել: Գյուղում երբևէ մանկապարտեզ չի եղել: Նախադպրոցական տարիքի երեխաների կրթության խնդրի լուծումը համայնքը որոշել էր իրականացնել դեռ 2020թ սուբվենցիոն ծրագրով՝ մշակույթի տան մի հատվածը հատկացնելով մանկապարտեզին: Շինարարությունը վաղուց ավարտվել է, իսկ համայնքը երկու տարուց ավելի սպասում էր մանկապարտեզի բացմանը:
«Իմ բալիկը 4 տարեկան է, մյուսը՝ 7, մեծս չհասցրեց գնալ մանկապարտեզ, փոքրս՝ կգնա: Մեր երեխաները հիմա դարձել են մեդիագրագետ, ավելի լավ է գնան մանկապարտեզ, խաղան, իրենց առօրյան լավ անցկացնեն: Դրանով կթեթևանա նաև մեր հոգսը»:
«Մենք անհամաբեր սպասել ենք մանկապարտեզի բացվելուն, տղաս ավելի անհամբեր էր դարձել ու մեծ ոգևորությամբ է հաճախում, որի համար շատ ուրախ եմ ու շնորհակալ: Վերջապես մանկապարտեզը բացվեց»:
Մանկապարտեզի շահագործման ձգձգման պատճառներից մեկը գույքի ձեռք բերումն ու կահավորումն էր, ինչպես նաև՝ գյուղում որակավորված մասնագետների պակասը: Մարզկենտրոնից մոտ 45 կմ հեռավորությամբ գտնվող գյուղում այլ համայնքներից հրաժարվել են աշխատել, քանի որ այստեղ տրանսպորտ չկա: Մանկապարտեզի տնօրեն Թամարա Մնացյանը Երվանդաշատի դպրոցում քիմիա ու կենսաբանություն է դասավանդում, 33 տարվա մանկավարժական ստաժ ունի, վերաորակավորվել է ու նոր աշխատանքի անցել.
«Մի տարի առաջ ես մասնակցել եմ նախադպրոցական ուսումնական հաստատության տնօրենի վերապատրաստման դասընթացին, ստացել եմ հավաստագիր, այսինքն՝ լիցենզավորված եմ և լիարժեք իրավունք ունեմ զբաղվելու այս գործունեությամբ: Ես տեղեկացված եմ նախակրթական հաստատության բոլոր չափորոշիչներին»:
Մանկապարտեզը նախատեսված է 60 երեխայի համար, երկու խմբանոց է: Երկու դաստիարակներից միայն մեկն է որակավորված մասնագետ, մյուսը՝ միջին-մասնագիտական կրթությամբ մանկավարժ է: Երկուսն էլ համայնքի բնակիչներ: Նորաբաց մանկապարտեզի կահավորմանն աջակցել են Մանկական զարգացման հիմնադրամն ու FCN-ը` Այժմ կենտրոնացեք երեխաների վրա բարեգործական կազմակերպությունը: Սուբվենցիոն ծրագրերում ներառված մանկապարտեզների նորոգման ու կառուցման հայտերում նոր մոտեցումներ կան՝ ասում է Արմավիրի մարզպետ Էդվարդ Հովհաննիսյանը.
«Մինչև խոշորացումը համայնքների հնարավորությունները շատ սահմանափակ են եղել և, ցավոք, այդ ժամանակ սուբվենցիոն ծրագրերն իրականացվել են միայն շինարարության մասով, այսինքն՝ չի ընդգրկել գույք և այլ անհրաժեշտ միջոցներ: Իսկ հիմա, երբ մանկապարտեզների ծրագրեր ենք իրականացնում, ենթադրենք՝ հիմնանորոգում ենք, ապա փաթեթում ամբողջը ներառում ենք: Մինչև խոշորացումը հիմնանորոգված մանկապարտեզների գույքերն ու սարքավորումները ձեռք ենք բերել միայն խոշորացումից հետո»:
Հիմա Երվանդաշատից ու հարևան Բագարան գյուղից մանկապարտեզ են հաճախում կրտսեր և միջին տարիքի 31 երեխաներ:
Թամարա Մնացյան. «Ցավով եմ նշում, որ մեր բալիկները տարիներ շարունակ զրկվել են նախադպրոցական հիմնական կրթությունը ստանալուց և դպրոց են հաճախել այս կարևոր օղակը շրջանցելով: Սա բնականաբար բարդություններ է առաջացրել և՛ սաների, և՛ նրանց դասավանադող ուսուցիչների ու ծնողների համար»:
Մանկապարտեզը կահավորված է, խոհանոցն ապահովված անհրաժեշտ սարքավորումներով: Շաբաթվա ճաշացանկն այնպես են պատրաստել, որը նպաստելու է երեխայի աճին ու զարգացմանը: Խոհարար Անի Ավետիսյան. «Առավոտյան տալիս ենք թեյ, հաց, պանիր,կարագ, խաշած ձու, ճաշին՝ ապուրներ, ետճաշին՝ փլավ, աղցան»:
Նախադպրոցական կրթօջախի առկայությունը սահմանամերձ գյուղում սոցիալական-ժողովրդագրական խնդիր է լուծում. երիտասարդները գյուղը չեն լքի կմնան ու կարարեն հայրենի բնակավայրում: Երվանդաշատի մանկապարտեզի վերակառուցման պայմանագրային արժեքը 25 մլն դրամ է՝ 65 տոկոս պետական բյուջեի համաֆինանսավորմամբ: Մանկապարտեզի ջեռուցման և էլէկտրաէներգիայի ծախսը թեթևացնելու նպատակով սուբվենցիոն ծրագրով կառուցվել է նաև ֆոտովոլտային կայան:
