ԿարևորՀասարակություն

Այսօր բացվեց Աբովյանի բժշկական կենտրոնը (ֆոտոշարք)

Ալիսա Գեւորգյան
«Ռադիոլուր»

Հանրապետության նախագահն աշխատանքային այցով այսօր Կոտայքի մարզում էր, որտեղ մասնակցել է  Աբովյանի  բժշկակական կենտրոնի բացման արարողությանը, շրջել   ամբողջովին հիմնանորոգված և արդիական սարքավորումներով հագեցած հիվանդանոցի բաժանմունքներում, ծանոթացել իրականացված աշխատանքներին  և ստեղծված պայմաններին: Այցի ընթացքում Սերգ սարգսյանը մասնակցել է նաև  Հրազդանի տարածքային  հարկային  տեսչության  բացման արարողությանը, ծանոթացել  տեսչության  վարչական շենքում  իրականացված հիմնանորոգման աշխատանքներին: 

Աբովյան քաղաքի բնակիչներն ուրախանալու հիմնավոր առիթ ունեն: Քաղաքում այսօր բացվեց ամբողջովին հիմնանորոգված և արդիական սարքավորումներով վերազինված Աբովյանի բժշական կենտրոնը, որտեղ միավորվել են քաղաքի հիվանդանոցն ու պոլիկլինիկան: Իրականացված աշխատանքներին ու ստեղծված պայմաններին այսօր ծանոթացավ նաև երկրի ղեկավարը:

Առողջապահության նախարար Դերենիկ Դումանյանի ներկայացմամբ՝  ծրագիրն իրականացվել է  մարզային առողջապահական   համակարգերի  օպտիմալացման  ծրագրի շրջանակներում: Բժշկական կենտրոնում  իրականացված ներդրումների ծավալը կազմել է մոտ 850 միլիոն դրամ: Գումարի մեծ մասը տրամադրել է Համաշխարհային բանկը։

Աբովյանը մայրաքաղաքից հեռու չէ, բայց ինչպես նշում է նախարարը, որդեգրած քաղաքականությունն այսպիսին է. յուրաքանչյուր բնակիչ պետք է հնարավորություն ունենա օգտվել իր տարածքին մոտ գտնվող արդիական բուժսարքավորումներով և համապատասխան մասնագետներով ապահովված բժշակական հաստատության ծառայություններից: Նրա համոզմամբ՝ հիմնանորոգված բժշկական կենտրոնը զգալիորեն կնվազեցնի այցելուների հոսքը դեպի մայրաքաղաք։

Դերենիկ Դումանյանի տեղեկացմամբ՝ 2014-ին  կբացվեն նաև Ալավերդու, Ճամբարակի, Բերդի և հնարավորության դեպքում նաև Կապանի   հիմնանորոգված հիվանդանոցները:

Հանրապետության նախագահի ներկայությամբ Հրազդանում  այսօր բացվեց  քաղաքի պետական եկամուտների կոմիտեի տարածքային հարկային տեսչության նոր շենքը: Տեսչության պետ Միքայել Ախշարումովը  լրագրողների հետ զրույցում նշեց, որ նոր շենքում կան բոլոր  պայմանները բարձրակարգ սպասարկում իրականացնելու համար։

Հրազդանի տարածքային հարկային տեսչությունը  սպասարկում է Հրազդանի և  Չարենցավանի  վարչական տարածքները, որոնք ներառում են  17 համայնքներ, տարածաշրջանի երեք քաղաքներ՝ Հրազդան, Չարենցավան և Ծաղկաձոր: Նշենք, որ Աշտարակում ևս այսօր բացվեց տարածքային հարկային տեսչության նոր շենք: Տեսչությունն ունի շուրջ 80 աշխատակիցներ  և սպասարկում է 118 գյուղական և երեք քաղաքային համայնք:

Հարկային և մաքսային  բարեփոխումների  շրջանակներում Երևանում և մարզերում շահագործվել են տարածքային հարկային տեսչությունների  17 վարչական նոր շենքեր: Առաջիկա մեկ-երկու տարում  Կապանում,  Իջևանում, Արմավիրում և  Մասիսում   վարչական նոր շենքերի շահագործամամբ  կավարտվի   ՊԵԿ հարկային մասով  վարչական շենքերի  արդիականացման ծրագիրը։

Back to top button