Ռուսաստանի նախագահ Վլադիմիր Պուտինը ԱՊՀ երկրների ղեկավարների ոչ պաշտոնական գագաթնաժողովի շրջանակներում հանդիպել է ՀՀ վարչապետ Նիկոլ Փաշինյանի հետ, հայտնում են Կրեմլի մամուլի ծառայությունից։
«Բոլորովին վերջերս մենք անցկացրել ենք միջկառավարական հանձնաժողովի նիստ, և գործընկերներն արձանագրել են, որ մենք տնտեսության ոլորտում իրավիճակի շատ դրական զարգացում ունենք։ Այս տարվա 10 ամիսներին առևտրաշրջանառությունն ավելացել է 73 տոկոսով: Սա լավ արդյունք է: Բայց մենք ձեզ հետ դեռ երեկ էինք սկսել, և հաջողվեց երեքով խոսել: Իհարկե, գլխավոր հարցը Հարավային Կովկասում իրավիճակի կարգավորումն է՝ հայ-ադրբեջանական հարաբերությունները, ամեն ինչ, ինչը կապված է Ղարաբաղի հետ: Այնպես որ, ինչպես պայմանավորվել էինք, բոլոր այս հարցերը մանրամասն կքննարկենք»,- ասել է Պուտինը:
ՀՀ վարչապետ Նիկոլ Փաշինյանն իր հերթին շնորհակալություն է հայտնել հրավերի, ԱՊՀ ոչ պաշտոնական գագաթնաժողովը կազմակերպելու համար։
«Իհարկե, դուք իրավացի եք. այս պահին գլխավոր, ամենահրատապ խնդիրը ճգնաժամն է, որը մենք ունենք Լաչինի միջանցքում։ Գիտեք, որ ռուս խաղաղապահների պատասխանատվության գոտում` Լաչինի միջանցքը գրեթե 20 օր արգելափակված է։
Ուզում եմ հիշեցնել, որ, համաձայն ՌԴ նախագահի, Ադրբեջանի նախագահի և Հայաստանի վարչապետի եռակողմ հայտարարության, Լաչինի միջանցքը պետք է գտնվի ռուս խաղաղապահների հսկողության տակ, իսկ Ադրբեջանի Հանրապետությունը երաշխավորել է. ուղևորների, բեռների, մարդկանց անխոչընդոտ անցում Լաչինի միջանցքով.
Այժմ պարզվում է, որ Լաչինի միջանցքը ռուս խաղաղապահների վերահսկողության տակ չէ։ Իհարկե, ես կցանկանայի քննարկել այս իրավիճակը, թե ինչ տարբերակներ կան։
Շնորհակալություն այս հնարավորության համար»,-ասել է Փաշինյանը։
