Արտակ Բարսեղյան
«Ռադիոլուր»
Այսօր «Եռաբլուր» պանթեոնում նշվեց ASALA-ի՝ Հայաստանի ազատագրության հայ գաղտնի բանակի ստեղծման 39-րդ տարեդարձը: 1975 թվականի հունվարի 20-ին Հայաստանի ազատագրության հայ գաղտնի բանակը Բեյրութում Համաշխարհային եկեղեցիների խորհրդի գրասենյակի դեմ կատարեց իր առաջին գործողությունը։ Այդ գործողության արդյունքում ոչ ոք չտուժեց:
Ընդհանուր առմամբ՝ մինչև 1997 թվականը ASALA-ի կողմից աշխարհի տարբեր երկրներում կազմակերպվել է ավելի քան 200 հարձակում, որոնց ընթացքում սպանվել են 42 թուրք դիվանագետներ։ Այս գործողությունների նպատակն էր ստիպել Թուրքիայի կառավարությունը հրապարակավ ճանաչել 1,5 մլն հայերի սպանության պատասխանատվությունը, փոխհատուցել և զիջել պատմական Հայաստանի տարածքները:
ԱՍԱԼԱ-յի գործունեության ընթացքում զոհվել է կազմակերպության ավելի քան 30 մարտիկ, ևս մի քանի տասնյակ անդամներ կալանավորվել էին և դատապարտվել: Վերջիններիս թվում էր Հակոբ Ջուլֆայանը, ով 1981թ. մասնակցել է Փարիզի թուրքական հյուպատոսարանի գրավմանը և երեք զինակիցների հետ դատապարտվեց 7 տարվա ազատազրկման: Այդ հարձակումը հայտնի է «Վան» գործողություն անունով: Այսօր Հակոբը եկել էր Եռաբլուր՝ ԱՍԱԼԱ-յի հուշակոթողի մոտ՝ հիշելու իր զինակիցներին:
Հայաստանի ազատագրության հայ գաղտնի բանակի անդամների հետ սերտորեն կապված էր Ոսկան արքեպիսկոպոս Գալփակյանը, ում հանդիսապետությամբ հուշակոթողի մոտ մատուցվեց հոգեհանգիստ: Հուշակոթողին կից ԱՍԱԼԱ-յի զոհված անդամների խորհրդանշական գերեզմանների մոտ ելույթ ունենալով՝ սրբազանը կարևորեց Հայաստանի ազատագրության հայ գաղտնի բանակի ներդրումը Հայ դատի պաշտպանության և Մեծ եղեռնի միջազգային ճանաչման գործում:
Ոսկան արքեպիսկոպոսը հայտնեց, որ հունվարի 26-ին Վանաձորում կբացվի Հայաստանի ազատագրության հայ գաղտնի բանակի մարտիկների հուշակոթողը։
