Հասարակություն

Կուտակային կենսաթոշակի դեմ երիտասարդները բողոքի հավաք են կազմակերպում

Կարեն Ղազարյան
«Ռադիոլուր»

«Ընդդեմ կուտակային կենսաթոշակային պարտադիր վճարումների» քաղաքացիական նախաձեռնության երիտասարդ անդամներն այսօր հրավիրած ասուլիսում հայտարարել են, թե շարունակելու են իրենց պայքարը` հունվարի 18-ին հրավիրելով հավաք-երթ: 

Քաղաքացիական նախաձեռնության անդամ Դավիթ Մանուկյանի խոսքով` հերթական ակցիայի նպատակը հանրությանն իրազեկելն է եւ, բացի այդ, ՍԴ-ին ցույց տալը, որ իրենց պայքարը զուտ մի քանի  տասնյակ արկածախնդիր երիտասարդների «պարապ վախտի» զբաղմունք չէ։

Քաղաքացիական նախաձեռնության խնդրանքով` ԱԺ-ի 4 խմբակցությունների պատգամավորները դիմել են ՍԴ` վիճարկելու օրենքի սահմանադրականությունը: Միաժամանակ` միջնորդություն է ներկայացվել, որ օրենքի կիրառումը կասեցվի մինչեւ ՍԴ որոշման ընդունումը: Օրենսդրության համաձայն` Բարձր դատարանը հարցով որոշում պետք է ընդունի մինչեւ հունվարի 25-ը:

Երիտասարդ ակտիվիստները նպատակ ունեն նաեւ իրենց հերթական ակցիայով ՍԴ-ին ցույց տալ, որ նախաձեռնությունը բազմահազար քաղաքացիների համախմբված եւ միահամուռ պայքար է: Երիտասարդներն ասացին, թե ՍԴ-ի բացասական որոշումն էլ իրենք վերջնակետ չեն համարում եւ պայքարը շարունակելու են:

Նախաձեռնության անդամ Սեւակ Ծատուրյանն էլ նկատեց, թե ոչ իշխանական բոլոր խմբակցությունները միավորվել են իրենց բարձրացրած հարցի շուրջ:

Հարություն Աղլամազյանն էլ իր հերթին կոչ արեց բոլորին` չընտրել ֆոնդեր եւ ֆոնդերի կառավարիչներ: Ըստ նրա` դրանով նույնպես կարող են ցույց տալ, որ դեմ են պարտադիր կուտակային կենսաթոշակային օրենքին։

Արձագանքելով դիտարկմանը, որ իր հայտնի հարցազրույցում խնդրի վերաբերյալ տեսակետ հայտնեց նաեւ երկրորդ նախագահը` երիտասարդ ակտիվիստները շեշտեցին, թե իրենք չեն ցանկանում, որ բուն խնդրից մարդկանց ուշադրությունը արհեստականորեն շեղվի այլ ուղղությամբ, ապա կարծիք հայտնեցին, որ ինչպես ցանկացած քաղաքացի, երկրորդ նախագահը նույնպես պարզապես իր տեսակետն է հայտնել:

Back to top button