Հասարակություն

Այս տարի հասարակությունը դժգոհել է հանգստյան երկարատեւ օրերից, ասում են հոգեբանը

Աիդա Ավետիսյան
«Ռադիոլուր»

Ասում են` ինչպես դիմավորես Նոր տարին, այնպես էլ կընթանա ողջ տարին: Սակայն  մեզ մոտ, գաղտնիք չէ, որ  ավելի շատ կարևորում են  սեղանների առատությունը: Հաճախ ենք լսում` «էլի եկավ էս Նոր տարին» կամ «էլ չենք անելու» արտահայտությունները,  սակայն համոզված եմ, որ յուրաքանչյուրի ամանորյա  սեղանը ձևավորվում է յուրովի ճոխությամբ:  Այստեղ են ասում՝ ձևը բովանդակությունից առաջ է ընկել:

Ամանորի  ընկալումն ու մշակույթի ձևավորումը հոգեբան Աննա  Բադալյանի ձևակերպմամբ`մեզ մոտ սխալ է: Ցավալին այն է, որ տոնական խուճապի մեջ անհանգիստ  են նաև  երեխաները, ասում է հոգեբանը և հավելում, որ նրանք էլ գենետիկորեն ժառանգում է ոչ թե տոնի  հրաշքը, այլ այն, ինչը ցուցաբերում են ծնողները:

Հենց այդ տոնական պատրաստություններից էլ առաջանում է սթրեսը, որն էլ  հաղթահարելը կապված է մարդու անհատական տեսակից, նշեց հոգեբանը։ Սակայն մեր  գենետիկական հատկանիշներից ելնելով՝ (այն, որ մենք ունենք ամուր կամային հատկանիշներ)  կարողանում ենք հաղթահարել  առօրեական սթրեսային իրավիճակները:  

Նյարդաբան Սամսոն Խաչատրյանն էլ նկատում է, որ մեզ մոտ հետտոնական սթրեսին  հարմարվելու խնդիր կա: Ռեժիմի փոփոխությունները, որը տեղի է ունենում Նոր տարվա օրերին, փոխում են մարդու  հետագա առօրյան:

Իսկ դիետոլոգ Հասմիկ Աբովյանն էլ նշեց, որ սթրեսից ձերբազատվելու համար անհրաժեշտ է սահմանափակել ճարպոտ  սնունդը, քանի որ դրա շատ օգտագործման դեպքում առաջանում է նորից ճաշակելու ցանկությունը: 

Արդեն հունվարի 10-ն է և անհրաժեշտ է թեժ տոնական օրերից վերադառնալ առօրեականին, խորհուրդ է  տալիս նյարդաբան Սամսոն Խաչատրյանն ու  ավելացնում, որ շեղումները պետք է հասցնել նվազագույնի։ «Պետք է կարգավորել քնի ժամերը,  սննդակարգը, ուշ ժամերի ավելի շատ և զանազան ուտելիքներից հեռու մնալ, հատկապես՝ աշխատանքային օրերին»։

Ըստ հոգեբանի՝ այս տարի հասարակությունը դժգոհել է հանգստյան երկարատեւ օրերից:

Back to top button