Սաթիկ Իսահակյան
«Ռադիոլուր»
Արմավիր քաղաքի բնակիչ Գոհար Հովհաննիսյանը իր անչափահաս երեք տղաների հետ Նոր տարին դիմավորելու է իր սեփական բնակարանում, որի մասին տարիներ շարունակ երազել է: Անօթևան ընտանիքի համար Ձմեռ պապի դերը ստանձնել էր Արմավիրի մարզպետ Աշոտ Ղահրամանյանը: Գոհար Հովհաննիսյանի ընտանիքի կացարանը 9 տարի եղել է Արմավիրի նավթի բազայի վարչական շենքի մի հատվածը: Նոր տարվա շեմին իրականացավ մոր և երեխաների երազանքը:
Արմավիր քաղաքի հյուսիս- արևելյան թաղամասի 29/2 առանձնատունը 0,116 հա հողամասով արդեն Գոհար Հովհաննիսյանի սեփականությունն է, որի մասին երազել է յուրաքանչյուր տարեմուտի։ Գոհարը 3 որդի ունի. Գրիգորը 14 տարեկան է, Աբրահամը` 12, իսկ Հարությունը` 10։ Ասել է, թե 3 զինվոր, որոնք տարիներ հետո դառնալու են մեր հայրենիքի պաշտպանները: Չունենալով բնակարան՝ նրանք Նոր տարին միշտ դիմավորել են արտասովոր պայմաններում: Առանց Նոր տարվա բացված սեղանի, իսկ տոնածառի շուրջը պտտվելու փոխարեն բակում այրել են ավտոմեքենայի անպետք անիվներն ու շուրջը պտտվելով ուրախացել։
Երեխաներին մեծ դժվարությամբ է պահում, բայց`սեփական քրտինքով: Գոհարի աշխատանքային գործիքները բահը, քլունգը, մուրճը և մետաղյա ծանր գործիքներն են, որոնցով վաստակում օրվա հացը։ Գոհար Հովհաննիսյանը 3 երեխաների հետ ապրել է նկուղային հարկերում, իսկ վերջին 9 տարում կացարան էր ընտրել Արմավիրի նավթի բազայի վարչական շենքի ճաշարանի մի փոքրիկ հատվածը, որը զրկված էր կոմունալ հարմարություններից:
Գոհարի բնակարանային պայմանների բարելավմանն աջակցեց Արմավիրի մարզպետ Աշոտ Ղահրամանյանը, ով իր և բարերարների միջոցներով Գոհարի ընտանիքին նվիրեց 4 սենյականոց սեփական առանձնատուն: Գոհարն ու իր որդիներն արդեն որոշել է հետագա անելիքների մասին: Առաջնեկը ավտոմեխանիկ է դառնալու, սեփական հողամասում կառուցելու է արհեստանոց և օգնելու է մորը:
Ամանօրյա նվերն արդեն պատրաստ է, սեփական բնակարանի կարմիր ժապավենն էլ կտրում է Գոհար Հովհաննիսյանի 2-րդ զավակը` Աբրահամը: Բնակարանամուտի և ամանօրյա լավագույն բարեմաղթանքը Գոհարի ընտանիքին ուղղեց Արմավիրի մարզպետ Աշոտ Ղահրամանյանը։
Տարեմուտը սեփական հարկի տակ նշելու 10-ամյա Հարությունի բարեմաղթանքի խոսքը ողջ ընտանիքի կողմից է. «Գոհանանք` երկնայինից, չդժգոհենք լույս կյանքից սրտերը մեր ջերմանան, տիրոջ սիրուց անսահման»։
