Ալիսա Գեւորգյան
«Ռադիոլուր»
ՆԱՏՕ-Հայաստան հարաբերություններ. ՆԱՏՕ-ն որպես պաշտպանության ժամանակակից մոդել». այսօր կայացած գիտաժողովը «ՆԱՏՕ-ի շաբաթ» միջոցառումների տրամաբանական շարունակությունն է։ Այն ևս մեկ միջոց է հասարակությանն իրազեկելու միջազգային այս կառույցի մասին, որի հետ Հայաստանը վաղուց համագործակցում է և դեռ երկար ճանապարհ ունի անցնելու։
Միջոցառման նախաձեռնող Գլոբալիզացիայի և տարածաշրջանային համգործակցության վերլուծական կենտրոնի տնօրեն Ստեփան Գրիգորյանն ասում է՝ նման թեմաներն այսօր ավելի քան երբևէ արդիական են։ Ըստ վերլուծաբանի՝ հասարակությունը պետք է տեղյակ լինի բոլոր այն այն կառույցների մասին, որոնց հետ Հայաստանը համագործակցում է, որպեսզի կարողանա ճիշտ կողմնորոշվել՝ ուր է գնում և ինչի համար:
Ստեփան Գրիգորյանի համոզմամբ՝ Հայաստանի անվտանգությունը անհրաժեշտ է կառուցել՝ հիմնվելով ոչ թե մեկ, այլ մի քանի կենտրոնների վրա։ ՆԱՏՕ-ի Խորհրդարանանակ վեհաժողովում Հայաստանի պատվիրակության անդամ, ԱԺ պատգամավոր Թևան Պողոսյանը դրական է համարում փաստը, որ ՆԱՏՕ-ի հետ համագործակցությունն ընդլայնում է իր շրջանակն ու պաշտպանության ոլորտում իրականացվող բարեփոխումներից զատ ընդգրկում է նաև մեր կյանքի այլ բնագավառներ ևս: Պատգամավորի համոզմամբ՝ Հայաստան-ՆԱՏՕ հարաբերություններում զարգացման լուրջ հեռանկար կա նաև խորհրդարանական հարթակում։
ՀՀ-ում Մեծ Բրիտանիայի դեսպան Ջոնաթան Էյվսի ձևակեպմամբ՝ ոմանք հակասություն են տեսնում Ռուսաստանի հետ հարաբերությունների խորացման ու ՆԱՏՕ-ի հետ սերտ համագործակցության միջև: Հայաստանը վառ օրինակն է այն բանի, որ այստեղ որևէ հակասություն չկա և հարաբերությունները կարող են զարգանալ երկու ուղղություններով միաժամանակ:
Ինչպես Մեծ Բրիտանիայի, այնպես էլ ՀՀ- ում Գերմանիայի դեսպան Ռայներ Մորելը բարձր գնահատեցին Հայաստանի ակտիվ մասնակցությունը ՆԱՏՕ-ի «Համագործակցություն հանուն խաղաղության» ծրագիրը և, մասնավորապես, հայ խաղաղապահների առաքելությունը Աֆղանստանում և Կոսովոյում։
