Ամերիկյան Moderna ընկերության եվրոպական ստորաբաժանման ղեկավար Դեն Շտայները հայտնել է, որ oմիկրոն շտամին հարմարեցված պատվաստանյութ կարող է արտադրվել երեք ամսից էլ քիչ ժամանակում։ Այդ հայտարարությունը, ՏԱՍՍ-ի փոխանցմամբ, նա արել է իտալական la Repubblica թերթին տված հարցազրույցում։
«Որքան շատ վիրուսը շրջանառվի, այնքան մեծ է նոր տարբերակի վտանգը: Երեք ամսից քիչ ժամանակ է պահանջվում օմիկրոնի շտամին հարմարեցված պատվաստանյութ արտադրելու համար», — ասել է Շտայները:
Միևնույն ժամանակ, ընկերության ներկայացուցիչն ընդգծել է, որ նորացված դեղամիջոցի հաստատման ժամկետը կախված կլինի ազգային կարգավորող մարմիններից։
Նոյեմբերի 27-ին Moderna-ն հայտարարել էր, որ աշխատում է ավելի հզոր խթանող պատվաստանյութի վրա, որը կարող է ավելի լավ պաշտպանել մարմինը SARS-CoV-2 կորոնավիրուսի նոր մուտացիաներից:
Նոր շտամն արդեն հայտնաբերվել է մոտ 80 երկրներում:
