Տևական դադարից հետո, Լոռի-Փամբակի երկրագիտական թանգարանը կրկին իր դռները բացել է այցելուների առաջ:
«ԼՈՌԻՆ ԺԱՄԱՆԱԿՆԵՐԻ ՀԱՆԴԻՊՄԱՆ ՎԱՅՐ» խորագրով ցուցադրության հանդիսավոր բացմանը ներկա են եղել մարզային և համայնքային իշխանությունների ներկայացուցիչներ՝ Լոռու փոխմարզպետ Գոռ Ասրյանը, մարզպետարանի աշխատակազմի կրթության վարչության մշակույթի և սպորտի բաժնի պետ Արամ Ռևազյանը, տարբեր բնագավառների ներկայացուցիչներ, մանկավարժներ, ուսանողներ, աշակերտներ, ինչպես նաև թանգարանների դերն ու նշանակությունը կարևորող քաղաքացիներ:
Մայր Աթոռ Սբ. Էջմիածնի Հայորդյաց տան «Շողակն» երգչախմբի ելույթից հետո ողջույնի խոսք է ասել թանգարանի տնօրեն Արմինե Ավդալյանը:
Վերջինս ողջունել է ներկաներին, շնորհակալություն հայտնել բացմանը մասնակցելու և մշտապես թանգարանին աջակցելու համար: Տնօրենը հանգամանալի ներկայացրել է հնագիտական և ազգագրական ֆոնդերի եզակի նմուշները, որոնք մեր տարածաշրջանի հարուստ պատմության լուռ վկաներն են:
Գոհունակության և երախտիքի խոսք է ասել Լոռու փոխմարզպետ Գոռ Ասրյանը, որը բարձր է գնահատել թանգարանի տնօրենի և աշխատակիցների կատարած գործը և հույս հայտնել, որ նման միջոցառումները կլինեն շարունակական:
Հյուրերի խոսքով՝ թանգարանը մեծ ու նվիրական գործ է կատարում այս ուղղությամբ, որը նաև գիտական ու ճանաչողական կարևոր նշանակություն ունի: Արվում է ամեն ինչ, որ ողջ տարվա ընթացքում թանգարանը լինի մարդաշատ, իրականացվեն բազմաթիվ ծրագրեր ու միջոցառումներ, և ընդլայնվի թանգարանի համագործակցությունների շրջանակը:
