Արցախի դպրոցականները դիմակ չեն կրելու
Արցախում աշակերտներն ու ուսուցիչները դպրոցում դիմակ չեն կրելու: Կրթական գերատեսչության առաջարկած ուղեցույցը, որի համաձայն գործելու են կրթօջախները, Արցախի պարետը հաստատել է, և այսօր ավելի քան 200 կրթօջախներ բացել են իրենց դռները՝ չնայած նոր կորոնավիրուսի վարակը չի նահանջել:
Արցախի Նորշեն գյուղի երեխաներն իրենց հազարավոր հասակակիցների նման այսօր դպրոց չեն հաճախել: Կրթօջախի դռները, ինչպես նաև ողջ գյուղը, փակ են: Մի շաբաթ առաջ այստեղ հայտնաբերված վարակը չի նահանջել: Սանիտարական բժիշկ Էռնա Բաղրյանի տեղեկացմամբ` վարակակիրները կապ ունեն դպրոցի հետ:
Նորշենում դպրոցը փակ կմնա մինչև վերջին հիվանդի դուրս գրվելը, ինչը, ինչպես հետևում է այսօր առողջապահության հրապարակած տվյալներից, կարող է ձգձգվել: Սեպտեմբերի 14-ի դրությամբ հայտնաբերված երկու նոր հիվանդներից մեկը Նորշենի բնակիչ է:
Այսօրվա դրությամբ` Արցախում նոր կորոնավիրուսից բուժվում է 39 մարդ, մեկուսացված է 81 քաղաքացի: Մի քանի հարյուրի է հասնում ինքնամեկուսացվածների թիվը։
Կորոնավիրուսի թափանցումը կրթօջախներ և դրանցից էլ փոխանցումը հանրություն կանխելու համար այսօր երեխաներին դպրոց ու մանկապարտեզ թողնելուց առաջ ջերմաչափել են: Երեխաների սահմանված թիվը դասասենյակներում պահպանելու համար, որոշ դպրոցներում պարապմունքները երկհերթ կլինեն, այնտեղ, որտեղ հնարավոր է դասերը բացօթյա կազմակերպել, կօգտագործեն նաև այդ հնարավորությունը: Դասասենյակների օդափոխումը և ախտահանումը հստակ պահանջ է` ասում է բժիշկ Բաղրյանը: Դպրոցներն ապահովվել են համապատասխան սարքերով և տեխնիկայով, բայց ոչ հավելյալ անձնակազմով: Այնպես որ, այսօր Ստեփանակերտի մեծ կրթօջախների մուտքերի մոտ գոյացել էին հերթեր. մեկ բժիշկը չէր հասցնում չափել բոլորի ջերմությունը:
Արցախի դպրոցականները դիմակ չեն կրելու: Պարետը համաձայնել է նախարարության առաջարկին: Բայց դասապրոցեսն անցնելու է առանց աշխույժ դասամիջոցների, ասում է փոխնախարարը: Այս բոլոր խնդիրներն այսօր ավելի շատ պատասխանատուների, ծնողների հոգածության ու մտահոգության առարկան էին: Աշակերտների մեծ մասը դպրոցական զանգին սպասում է վաղուց: