ՌԴ արտգործնախարար Սերգեյ Լավրովը հանդիպել է Ռուսաստանում հայկական և ադրբեջանական համայնքների ներկայացուցիչների հետ: Այս մասին տեղեկանում ենք ՌԴ արտգործնախարարության ֆեյսբուքյան էջից։
«Ռուսաստանի Դաշնության արտաքին գործերի նախարար Սերգեյ Լավրովը հանդիպել է Ռուսաստանի ադրբեջանական և հայկական համայնքների նշանավոր ներկայացուցիչների՝ «Киевская площадь» ՍՊԸ-ի տնօրենների խորհրդի նախագահ Գ.Ս. Նիսանովի և «Ռուսաստանի հայերի միություն» համառուսաստանյան հասարակական կազմակերպության նախագահ Ա.Ա. Աբրահամյանի հետ։
Քննարկվել է ադրբեջանական և հայկական համայնքների դերը Ռուսաստանի Դաշնության տարածքում ազգամիջյան խաղաղության և ներդաշնակության պահպանման գործում՝ գործող օրենսդրության շրջանակում: Նշվել է համատեղ բացատրական և կրթական աշխատանքի կարևորությունը՝ ազգային պատկանելության պատճառով Ռուսաստանի քաղաքացիների իրավունքների ոտնահարման դեպքերը կանխելու և վերացնելու համար:
Կարևորվել է ադրբեջանական և հայկական համայնքների կառուցողական ներդրման անհրաժեշտությունը Բաքվի և Երևանի միջև հարաբերությունների բարելավման խթանման համար պայմանների ստեղծման գործում»,- ասված է ՌԴ հաղորդագրության մեջ։
