Վանաձորի Շառլ Ազնավուրի անվան զբոսայգին ավելի քան 30 տարի անց նոր շունչ կստանա, այս մասին տեղեկացնում են Լոռու մարզպետարանից։ Հաղորդագրության մեջ նշված է նաև, որ Վանաձորի Տարոն 2 և Տարոն 4 թաղամասերում կկառուցվեն այգիներ։
«Մարզկենտրոնի ամենահին զբոսայգին՝ նախկին Քիմիագործների, այժմ արդեն՝ Շառլ Ազնավուրի անվան՝ շնորհիվ պետություն-համայնք համատեղ ներդրմամբ իրականացվող սուբվենցիոն ծրագրերի, ավելի քան 30 տարի անց կկենդանանա ու նոր շունչ կառնի»,- ասված է գրառման մեջ:
Ծրագրի իրականացման արդյունքում կսալիկապատվեն ճեմուղիները, կբարեկարգվի ջրավազանը և կտեղադրվի լուսային և ձայնային էֆեկտներով շատրվան։
Նախատեսվում է լուսավորության համակարգի արդիականացում, կանաչապատում։ Կբարեկարգվեն մուտքի դարպասները, ցանկապատը, հուշարձանի տարածքը։ Կտեղադրվեն սմարթ նստարաններ՝ լիցքավորման կետով՝ սնվող արևային էներգիայով, WiFi հնարավորություններով:
Շախմատի դպրոցի մոտ կտեղադրվի ինտերակտիվ շախմատի մեծ տախտակ և այլն:
Ծրագրերի ընդհանուր բյուջեն` նախահաշվային արժեքով, կազմում է 232.926.300 դրամ, որից 118.755.780 դրամը` համայնքային ներդրումն է, 21 մլն. դրամը՝ մասնավոր և ավելի քան 93 մլն դրամը՝ ներդրում պետբյուջեից:
