Արցախում ավարտվել է նոր կառավարության ձևավորման գործընթացը: 2017 թվականից գործող Սահմանադրության համաձայն՝ նախագահը կառավարությունը կազմավորում է միանձնյա՝ պաշտոնավարման մեկնարկից 20 օրվա ընթացքում: Եւս 20 օր գործադիրն ունի գործունեության ծրագիր կազմելու համար: Գործընթացը սկսվել և տեղի է ունենում նոր կորոնավիրուսի համավարակի տարածման պայմաններում:
Ընտրություններից հետո գործադրի ընդլայնված հավաքների մեծ մասը տեղի է ունենում նախագահական նստավայրում, որի դահլիճը կառավարության նիստերի դահիճից ավելի ընդարձակ է և հնարավորություն է տալիս պահպանել սոցիալական հեռավորությունը: Պաշտոնական վերջին բոլոր միջոցառումների ժամանակ դիմակ կրելը պարտադիր է: Ընդամենը երկու օրից՝ հունիսի 15-ից , պահանջը Արցախում պարտադիր է լինելու բոլորի համար՝ փակ տարածքներում և հանրային տրանսպորտում: Արդեն երկու օր է կամավորականները դիմակներ են բաժանում ուղևորներին:
Ոստիկանները ևս մարդկանց հորդորում են պահպանել կորոնավիրուսի հետ կապված ցուցումները: Եւս մեկ ամիս արցախցիները շարունակելու են ապրել արտակարգ իրավիճակի պայմաններում:
Գործադիրը 20 օր ժամանակ ունի գործունեության ծրագիր կազմելու և հրապարակելու համար: Նախագահ Հարությունյանը հրավիրած ընդլայնված խորհրդակցությունում նշել է 10 սկզբունք, որոնցով պետք է առաջնորդվեն գործադրի անդամները: Դրանցից առաջինը՝ «պաշտոնավարումը ծառայություն է ժողովրդին»:
Արցախի նոր գործադիր իշխանությունը՝ չնայած բարդ ու լարված ընտրական գործընթացներին, ձևավորվել է ոչ միակուսակցական սկզբունքով: Դրանում տեղ ունեն Արայիկ Հարությունյանի քաղաքական կոշտ ընդդիմախոսները: Մասիս Մայիլյանը շարունակում է պաշտոնավարել որպես արտաքին գործերի նախարար: Պաշտպանության բանակի նախկին հրամանատար, Արցախի հերոս Սամվել Բաբայանը Արցախի անվտանգության քարտուղարն է: Նրա «Միասնական Հայրենիք» կուսակցության և Արայիկ Հարությունյանի գլխավորած դաշինքի միջև համագործակցության հուշագիր է ստորագրվել, որը պետք է լինի կառավարության գործունեության հիմքում:
Արցախում այսպիսի հետընտրական քաղաքական վերադասավորումները ոչ միանշանակ են ընդունվել: Զրուցակիցս Տիգրան Գրիգորյանն է՝ Արցախի նոր խորհրդարան չանցած ընդդիմադիր քաղաքական ուժի՝ «Ազգային Վերածնունդ» կուսակցության ներկայացուցիչը:
Նոր կառավարության գործունեության ծրագիրը, որքան էլ հիմնված լինի քաղաքական ուժերի նախընտրական խոստումների վրա, այնուամենայնիվ համավարակի վտանգները հաշվի է առնելու: Արտակարգ իրավիճակի ռեժիմը երկարաձգվել է ևս մեկ ամսով: Գործադիր ու համայնքային իշխանության ոչ բոլոր մարմիններն են լիարժեք գործում: Ծառայությունների մեծ մասը մատուցում են առցանց: Համավարակի հետ կապված վերջին լավ լուրը Շահումյանի շրջանի 10 բնակավայրերում ազատ տեղաշարժի սահմանափակումների վերացումն է: Համապատասխան որոշումը պարետ Գրիգորի Մարտիրոսյանը ստորագրել է երեկ:
